Tanymal telejýrnalıst Tileýqabyl Myńjasardyń «Jahandy jaýlaǵan janr» atty kitaby jaryq kórdi

Avtor atalǵan kitap uzaq jyldar boıǵy eńbeginiń jemisi ekendigin jáne onda telejýrnalıstıkadaǵy jańalyq janrynyń qyr-syry týraly áńgimelegendigin aıtady. "Kópten beri adamdar "jas jýrnalısterge tájirıbe beretin bir nárse jazbaısyz ba" dep qolqa salyp júrdi. Iá dep qoıyp, bertinge deıin bastaı almaı júrdim. Sodan 2009 jyldyń 7 qazanynda, jeti degen jaqsy san ǵoı dep bastap kettim. Kitap elimizdiń jańalyqtar tóńireginde jumys jasap júrgen jýrnalısterge kishkene bolsa da kómegi tıe me degen oımen jazyldy. ", -deıdi avtor.

T.Myńjasar jańalyqtarǵa Odaqtyń kezinde asa mán berilmegendigin, olardyń báriniń júgin ortalyq teledıdardan "Vremıa" baǵdarlamasy alyp júrgendigin aıtady. "Olardyń jýrnalısteri óte myqty edi, stendap jasaǵanda, shet el jańalyqtaryn sheberlikpen beretin. Qazir elimizdiń tól telejýrnalıstıkasy qalyptasyp kele jatyr. Sońǵy 20 jylda osy janr elimizde de keń etek jaıyp barady. Óıtkeni kóptegen arnalar ashyldy, jýrnalıster arasynda básekelestik týyp, myqty jýrnalıster alǵa sýyrylyp shyǵýda", -deıdi T.Myńjasar.

Sondaı-aq ol jańalyq janry kúlli álemdi aqparatpen sýsyndatyp otyrǵan óte ózekti janr ekendigin aıtady. "Sondyqtan bul shynymen de "jahandy jaýlaǵan janr" dep oılaımyn", -deıdi avtor.

Arys baspasynan 1000 danamen shyqqan bul kitap elimizdiń táýelsizdiginiń 20 jyldyǵyna, "Habar" agenttiginiń 15 jyldyǵyna arnalyp otyr. Óıtkeni ondaǵy keıipkerler men reportajdardyń kóbi táýelsizdigimizdi nyǵaıtý jolynda atsalysyp jatqan aýyldaǵy adamdar jaıynda eken. Sonymen birge "telejýrnalıstıkaǵa qalaı kelý kerek, ózin-ózi daıyndaý degen ne, jańalyq qalaı jasalady, taqyryp pen keıipkerdi qalaı tabýǵa bolady?" degen máseleler jóninde áńgime qozǵalǵan.

Qazaqstan Jýrnalıster Odaǵy syılyǵynyń ıegeri Tileýqabyl Myńjasar ál-Farabı atyndaǵy Qazaq Ulttyq ýnıversıtetiniń 1975 jylǵy túlegi. «Habar» agenttigi qurylǵan kúnnen bastap osy arnada qyzmet etýde. 1998 jyldan beri «Habardyń» Almaty oblysy boıynsha menshikti tilshisi. Sonymen qatar ol «Eren eńbegi úshin» medalimen marapattalǵan, Almaty oblysynyń Qurmetti azamaty.