Tanymal tarbaǵataılyq tókpe aqyn Serikhan Jaqııanov ómirden ótti
ÓSKEMEN. QazAqparat - Aıtys əlemine sekseninshi jyldardyń sońynda tanylyp, «Qaraqasqa» atanǵan tarbaǵataılyq tókpe aqyn Serikhan Jaqııanov uzaq naýqastan qaıtys boldy, dep habarlaıdy Qazaqparat tilshisi.
Birneshe respýblıkalyq aıtystardyń jeńimpazy, aıtys óneriniń abyzy Manap Kókenovtiń ózi dombyrasyn syılaǵan Serikhan Jaqııanov 58 jasynda ómirden ótti.
Aıtys aqyny 1959 jyly 18 tamyzda Shyǵys Qazaqstan oblysy Tarbaǵataı aýdany Qabanbaı aýylynda dúnıege kelgen. Kólbaı Tógisov mektebinde 8 synypty bitirgen (1966-1974).
1977-1979 jyldary ásker qatarynda bolǵan. Jergilikti keńsharda túrli laýazymdar atqara júrip, 1984 jyly Shyǵys Qazaqstan oblysynyń bas aqyny ataǵyn alady.
Birneshe oblystyq, respýblıkalyq aıtystardyń júldegeri boldy. Qyzylorda oblysy Jańaqorǵan aýdanynda aqyn Manap Kókenovpen aıtysyp batasyn alǵan (1988). Onyń aqyndyǵyna rıza bop, bolashaq ónerine senim artqan Manap aqyn basyndaǵy taqııasyn kıgizip, 18 jyl ustap kele jatqan dombyrasyn óz qolymen usynǵan.
Taldyqorǵan qalasynda ótken «Birjannyń inileri, Saranyń sińlileri» atty respýblıkalyq aqyndar aıtysynda jeńis tuǵyrynan kóringen. Aqtóbe oblysynyń 120 jyldyq toıy men Qudaıbergen Jubanovtyń 90 jyldyq mereıtoıyna arnalǵan aıtysta júldeger atandy.
Torǵaı oblysynda «Úsh arys» dep atalǵan respýblıkalyq aıtystyń bas júldesin, Qostanaı qalasynda ótken Y. Altynsarın atyndaǵy aıtystyń І orynyn, Semeı qalasynda jeltoqsanǵa arnalǵan respýblıkalyq aıtystyń bas júldesin, Tarbaǵataı aýdanynda Qabanbaı batyrdyń 300 jyldyq mereıtoıyna arnalǵan respýblıkalyq aıtystyń І orynyn (1992) ıelengen. Almaty qalasynda ótken halyqaralyq aqyndar aıtysynyń júldegeri.
Aqyndy aqtyq saparǵa shyǵaryp salý rəsimi 7 mamyr kúni saǵat 11.00-de Óskemenniń irgesindegi Menovnoe aýylynyń zıratynda ótedi. Súıegi Ulan aýdanynyń Otradnoe aýylyndaǵy úıinen shyǵarylady.
Foto: aitysker.org
