Tanymal óner juldyzdary men sport sheberleri Túrkistannyń barlyq óńirin aralady
Sharany QR Tuńǵysh Prezıdenti, Elbasy N.Nazarbaevtyń «Bolashaqqa baǵdar: rýhanı jańǵyrý» baǵdarlamasy aıasynda Túrkistan oblystyq qoǵamdyq damý basqarmasy men QMDB Túrkistan oblystyq fılıaly uıymdastyrdy.
Túrkistan oblystyq óńirlik kommýnıkatsııa qyzmetiniń málimetinshe, kezdesýdiń basty maqsaty – óńirimizden shyqqan elimizge tanymal óner juldyzdaryn, sport sheberleri men din ókilderin halyqpen júzdestirip, jastardyń patrıottyq sezimderin oıatý, olardyń sportqa degen qyzyǵýshylyǵyn arttyrý, ózge dinı aǵymdardan aýlaq bola otyra qazaqı salt-dástúrimizdi qatań saqtaýdy nasıhattaý.
«Túrkistannyń rýhanı kerýeni» degen atpen kezdesý Túrkistan oblysynyń barlyq derlik aýdan, qalalarynda uıymdastyryldy. Atap aıtsaq, Qazaqstannyń eńbek sińirgen sport sheberi, erkin kúresten Qazaqstannyń 4 dúrkin chempıony Aqjúrek Tańatarov, QR Eńbek sińirgen qaıratkeri, tanymal ánshi Saıat Medeýov jáne Jetisaı aýdanynyń bas ımamy Bekzat Syzdyqov Bekzat Saryaǵash pen Keles aýdany turǵyndarymen kezdesý ótkizdi.
Estrada juldyzy Erkin Nurjanov, armrestlıng sportynan álemniń birneshe dúrkin chempıony Qydyrǵalı Ońǵarbaev jáne Tóle bı aýdanynyń bas ımamy Samat Anarbaev Saıram men Túlkibas aýdandaryn aralady.
Báıdibek pen Sozaq aýdandaryna sapar shekken Qazaq kúresinen QR chempıonatynyń qola, kúmis júldegeri Jumanazar Ersultanov, Saıram aýdany Báıdibek ata meshitiniń ımamy Arystan Ospanov jergilikti turǵyndarmen kezdesip, taǵylymy mol áńgimeler aıtyldy.
Armrestlıng sportynan álemniń birneshe dúrkin chempıony Maǵjan Shamıev men Túrkistan oblysynyń bas ımamy Aqtamberdi Musabek Maqtaaral men Jetisaı turǵyndarymen júzdesti.
Boksshy, Qazaqstannyń eńbek sińirgen sport sheberi Muhtarhan Dildabekov, QMDB Túrkistan oblysy boıynsha ókildiginiń Jastar isi sektorynyń jetekshisi Qaırat Dáribaev Ordabasy men Otyrar aýdany turǵyndarymen júzdesti.
Boksshy, Mıanmada ótken Álem chempıonatynyń qola júldegeri Birjan Jaqypov jáne Saıram aýdanynyń bas ımamy Seıdahmet Temirbek Tóle bı men Qazyǵurt jurshylyǵymen kezdesip, ashyq áńgime júrgizdi.
Qazaqstan Respýblıkasynyń eńbek sińirgen sport sheberi, sambodan úsh dúrkin álem chempıony Arman Ospanov men Túlkibas aýdanynyń bas ımamy Serik Maǵaz Arys pen Shardara aýdandaryna taban tirese, karate-dodan Qazaqstannyń halyqaralyq dárejedegi sport sheberi Nurjan Aqpanbet jáne Báıdibek aýdanynyń bas ımamy Ulyqbek Álıakbaruly Kentaý qalasy jurtshylyǵymen bas qosyp, keleli keńes ótkizdi.
Elimizge tanymal óner juldyzdary men sport sheberleri osylaısha Túrkistannyń rýhanı kerýeniniń kóshin bastap oblysymyzdyń barlyq aýdan, qalalaryn aralap shyqty. Kezdesý barysynda jergilikti jastar óz oılaryndaǵy suraqtaryn qoıyp, erkin formattaǵy suhbat órbidi.
Aıta keteıik, «Túrkistannyń rýhanı kerýeni» kezdesýi 28 qarasha kúni Túrkistan qalasy HQTÝ mádenıet saraıynda ótetin bolady.
