Tanymal mıllıarder Ýorren Baffett qaterli isikke shaldyqty
ASTANA. 19 sáýir. QazAqparat - Belgili amerıkalyq bıznesmen-mıllıarder, Berkshire Hathaway ınvestıtsııalyq holdınginiń basshysy, 81 jastaǵy Ýorren Baffett dárigerlerdiń odan prostata qaterli isigin tapqanyn aıtty,
dep habarlaıdy Birinshi arna Eýrazııa .
Bul kúıinishti habardy ol kompanııa aktsıonerlerine jetkizdi. Baffett óziniń arnaıy málimdemesinde óz dertiniń aýrýdyń bastapqy satysynda ekenin jetkizdi. «Degenmen, dárigerlerdiń aıtýynsha, bul aýrýdan meniń ómirime tónip turǵan qaýip joq jáne kúsh-qýatyma zııanyn tıgizbeıdi. Medıtsınalyq saraptama kórsetkendeı, qaterli isik deneniń basqa bólikterine jaıylmaǵan», - delingen olıgarhtyń málimdemesinde.
Baffettiń aıtýyna qaraǵanda, ol shildeniń ortasynan bastap eki aılyq radıoterapııa kýrstarynan ótedi. «Bul jaǵdaı meniń qozǵalysyma shekteý qoıýy múmkin, biraq kúndelikti ómir daǵdylaryma esh áserin tıgizbeıdi», - dep sendirgen mıllıarder ózin sergek te jigerli sezinetinin aıtty. Budan burynyraq, aqpan aıynda ol óziniń muragerin taǵaıyndaǵanyn jetkizgen bolatyn, biraq onyń aty-jóni belgisiz kúıinde qaldy.
Ýorren Baffett 1930 jyly 30 tamyzda Amerıkanyń Omaha qalasynda dúnıege kelgen, 1951 jyly Kolýmbııa ýnıversıtetiniń bıznes mektebin bitirdi. 1965 jyldan bastap Berkshire Hathaway ınvestıtsııalyq-qarjylyq holdınginiń bas dırektory bolyp qyzmet atqarady. Ár jyldary The Washington Post, Coca-Cola jáne basqa da kompanııalardyń Dırektorlar keńesiniń quramyna engen. Búgingi kúni onyń dáýleti 44 mıllıard dollarǵa baǵalanady.
