Tanymal mánerlep syrǵanaýshy Elızabet Tursynbaeva depýtattyqqa úmitker atandy
Almaty qalasy máslıhatynyń depýtattyǵyna úmitkerlerdiń partııalyq tizimi 63 adamnan, al máslıhatqa bir mandatty okrýgtar boıynsha 21 adamnan turady.
Onyń quramyna áleýmettik jáne kásibı salalardyń barlyq ókilderi endi.
Sonymen qatar, partııalyq tizimde qalanyń damýyna ǵana emes, sondaı-aq el namysyn álemdik arenada qorǵap júrgen megapolıstiń tanymal tulǵalary da bar.
Atap aıtar bolsaq, 23 jastaǵy qazaqstandyq mánerlep syrǵanaýshy, Qazaqstan Respýblıkasynyń eńbek sińirgen sport sheberi, álem chempıonatynyń kúmis júldegeri - tizimdegi eń jas úmitker retinde Elızabet Tursynbaeva, Qazaqstandaǵy áıelder arasyndaǵy birinshi álem chempıony, áıelder halyqaralyq grossmeısteri jáne erler halyqaralyq sheberi Jansaıa Ábdimálik bar.
Úmitkerlerdiń qataryna kásipkerler, qalany damytýǵa baǵyttalǵan túrli jobalardyń qatysýshylary Beknur Nesipbaev, Dosbol Jylqybaev, aktrısa Olga Spırına, bloger, kórkem fılmder men baǵdarlamalar prodıýseri Almas Saǵynuly, jýrnalıst Mahabbat Isenova men múgedekter quqyǵyn qorǵaýshylar Ulan Іńkárbekov, Bogdan Djepka endi.
«Jalpy partııalyq tizimdi qalyptastyrý kezinde genderlik sáıkestilik pen jas shegi eskerildi. Bul rette áıelder men 35 jasqa deıingi jastar úshin kvota saqtaldy. Máselen, áıelderdiń úlesi 42,9% bolsa, 35 jasqa deıingi jastar 36,5%-dy quraıdy. Úmitkerlerdiń ortasha jasy — 41 jas. Budan ózge shaǵyn jáne orta bıznes sýbektileri ókilderiniń sany boıynsha kóshbasshy sanalatyn Almaty tizimindegi kandıdattardyń 35% jýyǵy - bıznes-qurylym ókilderi»,- dep habarlady partııanyń baspasóz qyzmetinen.
Sonymen qatar, konferentsııada barlyq usynystar men talap-tilekter eskerilip, aldaǵy 5 jylǵa arnalǵan 5 maqsattan turatyn Almaty qalasy boıynsha «AMANAT» saılaýaldy baǵdarlamasynyń jobasy bekitildi.
Sondaı-aq kezekten tys konferentsııada «AMANAT» partııasynyń kezekten tys XXV sezine qatysý úshin Almatydan delegattardyń tizimi anyqtaldy.
