Tanymal keskindemeshi Q.Ájibekuly QR Tuńǵysh Prezıdenti murajaıynda sheberlik dáristerin ótkizedi

Bul týraly QR Tuńǵysh Prezıdenti Muraıjaıynyń baspasóz qyzmeti málim etti.

Astana qalasy resmı saıtynyń habarlaýynsha, murajaı óz qyzmetinde ártúrli jastaǵy balalarmen jumys jasaýǵa kóp kóńil bóledi. Balalar Murajaıdyń «Balalyq shaqtan kózqaras» atty áleýmettik mańyzy bar jobasy aıasynda ótetin barlyq is-sharalaryna (kórme, baıqaý, festıval, sheberlik-dáristeri) belsendi qatysady. Qazaqbaı Ájibekulynyń sheberlik dáristeri, murajaıdyń turaqty áriptesteri - Balalar kórkemsýret mektebiniń tárbıelenýshilerine sýretshimen tikeleı shyǵarmashylyq qarym-qatynas jasaýǵa erekshe múmkindik beredi. Sheber jas sýretshilerdi beıneleý óneriniń akademııalyq negizderimen tanystyrady.

Sheberlik dáristeri Qazaqbaı Ájibekulynyń «Asyl arman» atty jeke kórmesi ornalasqan murajaıdyń Úlken kórme zalynda ótedi. Ekspozıtsııa Qazaqstan Respýblıkasy Tuńǵysh Prezıdenti Murajaıynyń qorynda saqtaýly sýretshiniń alǵashqy jumystary men óz halqynyń kórkemsýret jylnamasyn qalyptastyrǵan Qoǵam men sheber dúnıetanymynyń damýy jaıly baıandaıtyn jańa týyndylaryn kórýge múmkindik beredi.

Ózindik qabileti turǵysynan alǵanda, Q.Ájibekuly - monýmentalıst. Álibaı Bapanov pen Kenjebaı Dúısembaevtyń shákirti, 1986 jyldan bastap respýblıkalyq, búkilodaqtyq jáne halyqaralyq kórmelerge qatysady. Qazirgi tańda Q.Ájibekuly ózindik qoltańbasy bar avtor, Qazaqstan sýretshiler Odaǵynyń múshesi, kóptegen júldelerdiń laýreaty, sonyń qatarynda Á. Qasteev atyndaǵy arnaıy syılyqtyń (1999 j.), QR Úkimetiniń «Daryn» memlekettik jastar syılyǵynyń ıegeri (2001 j.). «Astana-Báıterek», «Astananyń gúldenýi - Qazaqstannyń gúldenýi» syndy kóptegen baıqaýlardyń jeńimpazy, QR Prezıdenti stıpendııasynyń (2009 j.) jáne Memlekettik stıpendııanyń (2010 j.) laýreaty. 2012 jyly Q. Ájibekuly «Qazaq halyq eposy. Qazaq halqynyń tarıhy men salt-dástúrleri» respýblıkalyq baıqaýynyń jeńimpazy atanyp, óziniń shyǵarmashylyq ustanymdaryna degen adaldyǵyn taǵy bir márte dáleldedi.