Tanymal «Kelin» telehıkaıasynyń juldyzymen kezdesýge «Han Shatyrǵa» 23 myńnan astam adam jınaldy (FOTO)

Ulttyq telearnanyń kórermenderi Sıdhart Shýkhlanyń kelýin asyǵa kútti jáne ony áýejaıǵa baryp gúl shoqtary men ásem sharlarmen qarsy aldy.

Sıdharttyń aıtýynsha, Mýmbaıdan shyqqanda aýa temperatýrasy +30 gradýs bolǵan eken. Astanada biraz tońǵanyn jasyrmady. Soǵan qaramastan, qazaq halqynyń qonaqjaılyǵy daladaǵy aıazdy qolmen julyp alǵandaı. Sonymen qosa, elordanyń záýlim ǵımarattary men qalyń qarlary Sıdhartqa erekshe áser etken kórinedi. Ol qys mezgilinde shańǵy sportymen aınalysqandy unatatynyn jetkizdi.

28 aqpan, senbi kúni, saǵat 15.00-de «Han Shatyr» saýda-oıyn saýyqtyrý ortalyǵynda akter kórermendermen kezdesip, aftograf-sessııa ótkizdi. Aktermen kezdesýge «Han Shatyrǵa» 23 myńnan astam adam keldi.

Sonymen qatar, 28 aqpan kúni «Juldyzben keshki as» uıymdastyrylyp, ótkizildi: «Qazaqstan» respýblıkalyq teleradıokorporatsııasynyń veb-portalynda jarııalanǵan vıktorına jeńimpazdary Astana qalasynyń meıramhanalarynyń birinde Sıdhart Shýkhlamen jáne tanymal otandyq «Qara shańyraq» telehıkaıasynda basty rólderdiń birin somdaǵan aktermen keshki as ishý múmkindigine ıe boldy. 2 naýryz, dúısenbi kúni, «Qazmedıa ortalyǵynyń» 11-qabatynda saǵat 12.00-de Sıdhart Shýkhla jáne otandyq tanymal «Qara shańyraq» telehıkaıasynda Álisherdiń rólin somdaǵan Azamat Satybaldy, Dáýletti somdaǵan Ádil Ahmetov, Mádıdi somdaǵan Dáýren Serǵazınniń BAQ ókilderine arnalǵan baspasóz máslıhaty ótti.

Óz kezeginde Sıdhard Shýkhla «Qazaqstanǵa keletin kezimde ne kúterimdi bilmedim. Degenmen, ushaqtan túskennen bastap Qazaqstannyń ǵajap memleket ekenin, adamdarynyń qonaqjaı ekendigin baıqadym. Qazaq halqy shyn júrekten rızashylyqpen, qonaqjaılyqpen qarsy aldy. Sizder de bizder sııaqty otbasyna úlken mán beredi ekensizder», - dedi.

Sonymen qatar, ol kelgen sátten bastap birneshe fotosessııaǵa qatysyp, tipti, keıbir adamdardyń sýretke túsýden sharshaǵan joqsyń ba, dep suraǵanyn aıta kele: «Sol sátterde aınalamdaǵy adamdar, ásirese, qyzdar sulýlyqtarymen tánti etti. Tipti, Qazaqstannan ketkim de kelmeı qaldy. Ókinishke oraı, búgin elime oralamyn. Sizderdiń qonaqjaılylyqtaryńyzdy saǵynatyn bolamyn», - dedi S.Shýkhla.

Tanymaldylyǵy týrasynda qoıylǵan jýrnalıst saýalyna Sıdhart: «Akter bolmas buryn men model boldym. Al, «Kelin» telehıkaıasy men túsken tórtinshi telehıkaıa. «Kelin» Úndistanda da tanymal jáne úzdik telehıkaıalardyń biri deýge bolady. Jurtty qyzyqtyratyny - telehıkaıanyń sońy qalaı bitedi. Men aıtar edim, joǵary reıtıng beretin telehıkaıanyń sońyn ne úshin kútesizder?»,-dep jaýap berdi.

«Qazaqstannyń kınoındýstrııasy týraly kóp bile bermeımin. Biraq, sizderdiń elge kelgeli beri qazaqtyń akterlerimen tanystym. Baıqaǵanym, olar halyq arasynda óte tanymal, jurt olardy jaqsy kóredi»,-deıdi akter.

Óz kezeginde sóz alǵan A.Satybaldy «Qara shańyraq» serıalyna qatysty oı-pikirlerimen bólisti. «Qara shańyraqtaǵy» stsenarııdiń shynaıylyǵy, akterlik quram - bizge úlken tájirıbe boldy. Túsirilim jumystary alty aıǵa sozyldy. Kún saıyn birge júrgendikten, keıde tipti bir-birimizdi sol telehıkaıadaǵy esimderimizben atap qalyp júrdik. «Qara shańyraq» - qazaq telehıkaıalaryna jańasha lep alyp kelgen týyndy. Sebebi, biz munda shynaıy oınaýdy úırendik. Munyń aldynda túsken týyndylarymyzda sál-sál teatrdaǵydaı ásirelep oınaý boldy. Ne nárse bolsyn tájirıbemen keledi emes pe? «Qara shańyraq» bizge shynaıy oınaýdy úıretti», dedi A.Satybaldy.

Aıta ketý kerek, búgin «Qara shańyraq» telehıkaıasynyń sońǵy bólimi. Ulttyq arnadan saǵat 21.50-de tamashalaı alasyzdar.

2 naýryz kúni saǵat 15.00-de Sıdhart Shýkhla «Qazaqstan» ulttyq arnasynda tikeleı efırdegi «Áıel baqyty» baǵdarlamasynda qonaqta boldy. Sonymen qatar, búgin, 2 naýryzda saǵat 23.30-da telekórermender tanymal juldyzdy «Túngi stýdııada Nurlan Qoıanbaev» tok-shoýynan kóre alady.

2012 jyldan beri Qazaqstanda úndiniń televızııalyq kórsetiliminiń «Kelin» serıaly úzdik bolyp keledi. Ádemi keıipkerler, jaqsy dýblıaj, ádemi qoıylym reıtıng kórsetkishteriniń ósýine oń yqpal jasady.

«Kelin» Úndistandaǵy tanymal telehıkaıalardyń biri. Kınoda áleýmettik dástúrler taqyryby qozǵalady. Telehıkaıa týǵan el men qara shańyraqty súıip, ata dástúrdi qurmetteýge shaqyrady. Bul turǵydan alǵanda, «Kelin» telehıkaıasy «Qazaqstan» telearnasynda efırge shyǵatyn otbasy men otbasylyq qundylyqtardy dáripteýge baǵyttalǵan otandyq «Qara shańyraq» telehıkaıasymen sátti úndesip jatyr.

Sıdhart Shýkhla Mýmbaıda dúnıege kelgen. 34 jasta. 2008 jyldan beri akter sheberligin shyńdap keledi. Budan buryn sán bıznesinde qyzmet atqarǵan. «Juldyzdarmen bı bıleý» shoýyna qatysqan. Ústel tennısimen jáne fýtbolmen shuǵyldanady. 2013 jyly Úndiniń Televızııa Akademııasy Sıdhartqa «Jyl ártisi» ataǵyn bergen bolatyn. Sol jyly jyl saıynǵy «Zee Gold Awards» TV syılyǵynyń nusqasy boıynsha ol eń «deneli» akter atandy. Úndiniń «Stardust» kıno týraly jýrnaly 2014 jyly ony kınoındýstrııadaǵy «Úmit kútetin jas akterlerdiń biri» dep baǵalaǵan bolatyn. Al Úndiniń jyl saıynǵy «Filmfare Awards» kınosyılyǵy úndi tilinde túsirilgen fılmderdegi jetistikteri úshin Sıdhartty «Erler debıýti-2015» syılyǵyna usyndy. Qazirgi ýaqytta Sıdhart úndiniń belgili prodıýseri Karan Djoharmen úsh fılmge túsý úshin shartqa qol qoıdy.