Tanymal qazaqstandyq veloshabandoz Andreı Kashechkın «Pro Team Astana» komandasyna oralady
TANA. 2 tamyz. QazAqparat - Tanymal qazaqstandyq veloshabandoz Andreı Kashechkın «Pro Team Astana» komandasyna oralady, dep habarlady QR Velosport federatsııasynyń baspasóz qyzmetinen.
Federatsııanyń atap ótýinshe, dúısenbi kúni Monakoda A.Kashechkın «Pro Team Astana» velokomandasynyń menedjmentinen shaqyrý alǵandyǵyn jáne qazaqstandyq komandaǵa aýysýǵa daıyndalyp jatqandyǵyn jarııa etken. Sonymen qatar ol ıtalıandyq «Lampre» komandasymen aradaǵy kelisimsharttyń aıaqtalǵandyǵyn, al «Pro Team Astana» komandasymen kelisimshart jasasýǵa aıtarlyqtaı kedergiler týyndap otyrmaǵandyǵyn málimdegen.
«Qazir taraptardyń zańgerlik konsýltatsııalary úderisi aıaqtalýǵa jaqyn. Qaǵaz jumystary aıaqtalǵannan keıin biz Andreı Kashechkınmen kelisimshartqa qol qoıylǵandyǵy týraly habarlaımyz», - dedi «Pro Team Astana» komandasynyń kommertsııalyq dırektory Aıdar Mahmetov.
Sondaı-aq federatsııanyń aqparatyna sáıkes, A.Kashechkın «Týre Výelta-2011» kópkúndiginde «Astana» komandasynyń kóshbasshysy retinde jarys jolyna shyǵýǵa jáne aǵymdaǵy jyldyń qalǵan maýsymynda «ProTeam Astana» komandasynda aqysyz óner kórsetýge peıil tanytyp otyr.
«Andreı Kashechkın Vınokýrovpen birge Astana komandasynyń irgesin qalaýshylardyń biri. Sondyqtan onyń komandaǵa oralýy óte zańdy ári mańyzdy oqıǵa bolyp tabylady. Sonymen qatar buǵan deıin komanda basshylyǵy málim etkendeı, biz «Astana» komandasyna eń úzdik qazaqstandyq veloshabandozdardy tartýǵa nıettimiz jáne Kashechkınniń oralýy - shyndyǵynda da ulttyq komanda qalyptastyrýdaǵy mańyzdy qadamdardyń biri», - dedi A.Mahmetov.
Óz kezeginde bul shaqyrtýdy uzaq ýaqyt kútkendigin jasyrmaǵan A.Kashechkın: «Ózimniń ýaqytym keldi dep sanaımyn. Men tek qana Qazaqstan týy astynda óz múmkindigimdi kórsetýim kerek», - dedi.
