Tanymal Gollıvýd juldyzy Qazaqstannyń qaıyrymdylyq qoryna qarajat aýdarady

ASTANA. QazAqparat - Amerıkalyq akter, «Oskar» syılyǵynyń ıegeri, «Kıng Kong», «Jyrtqysh», «Pıdjak», «Pıanıst» fılmderinde basty rólderdi somdaýshy Edrıan Broýdı Qazaqstannyń qaıyrymdylyq qorlarynyń birine qarjylaı kómek kórsetedi, dep xabarlaıdy QazAqparat tilshisi.

Bul týraly ataqty akter Astanada XIII halyqaralyq «Eýrazııa» kınofestıvaline arnalǵan baspasóz máslıhatynda málim etti.

«Sýret salýmen bala kezimnen beri aınalysamyn.  Men úshin óner - jaı ǵana kartına salý emes, shyǵarmashylyqtyń bostandyǵy, talantty adamdardyń shyǵarmashylyǵy men janynyń  derbestigi ispettes. Sondaı-aq, kınematografııa men ónerde qatar júrýim tabıǵatty qorǵaý, VICh-pen aýyratyn adamdarǵa kómek, balalardyń densaýlyǵy baǵyttaryndaǵy fılantroptyq, qaıyrymdylyq sharalaryna qatysýyma da úlken septigin tıgizip jatyr. Oy oraıda, balalardyń ál-aýqatymen aınalysatyn qazaqstandyq uıymdardyń birine de qaıyrymdylyq jasaýdy josparlap otyrmyn», - dedi Edrıan Broýdı.

Akterdiń aıtýynsha, ózi salǵan kartına satylymynan túsken qarajat qaıyrymdylyqpen aınalysatyn qazaqstandyq uıymdardyń nemese jobalardyń birine aýdarylady. 

Eske sala ketsek, búgin «Qazaqstan» ortalyq kontsert zalynda «Eýrazııa» kınofestıvaliniń ashylý saltanaty ótedi. Oǵan «A» sanatyndaǵy Nıkolas Keıdj, Endrıen Broýdı, Djon Malkovıch syndy tanymal álemdik juldyzdar qatysady.

Kınofestıval aıasynda kıno óneriniń álemdik juldyzdary Nıkolas Keıdj, Endrıen Broýdı, Djon Malkovıch jáne basqa da juldyzdar sheberlik sabaqtaryn ótkizetin bolady.