Tanymal balalar hırýrgi Nurlan Aqparov ómirden ozdy
ALMATY. QazAqparat – Belgili balalar hırýrgi, medıtsına ǵylymdarynyń doktory, Eýropa ǵylym akademııasynyń akademıgi, Pedıatrııa jáne balalar hırýrgııasy ǵylymı ortalyǵynyń hırýrgııa bóliminiń meńgerýshisi Nurlan Aqparov qaıtys boldy, dep habarlaıdy QazAqparat.
Bul týraly Pedıatrııa jáne balalar hırýrgııasy ǵylymı ortalyǵynyń ujymy men basshylyǵy Facebook -te jazdy.
«Bul tek biz úshin ǵana emes, búkil Qazaqstan úshin orny tolmas qaıǵy», - dep jazylǵan N.N.Aqparovtyń týystary men jaqyndaryna kóńil aıtý mátininde.
Nurlan Nurkenuly Aqparov medıtsına salasynda 40 jyldan astam jumys istegen. Onyń ishinde 28 jyldan astam Pedıatrııa jáne balalar hırýrgııasy ǵylymı ortalyǵynda qyzmet etti. Bul aralyqta dáriger 10 000-nan astam operatsııa jasady, kóptegen balalarǵa ekinshi ómir syılady. N.N. Aqparov Qazaqstan Respýblıkasynda operatsııalardyń 21 túrin alǵash ret engizgen, 300-ge jýyq ǵylymı jumys jazǵan, onyń ishinde halyqaralyq retsenzııalanatyn jýrnaldarda jarııalaǵan. Úsh monografııanyń, 21-ónertabysqa aldyn-ala patenttiń jáne úsh ratsıonalızatorlyq usynystardyń avtory. 1994 jyly Nurlan Aqparov akademık Kamal Ormantaevtyń jetekshiligimen hırýrgııa bólimin ashty. Sol sátten ómiriniń sońyna deıin balalar hırýrgııasy bólimin meńgerdi.
Onyń jetekshiligimen bir doktorlyq jáne eki kandıdattyq dıssertatsııa qorǵaldy. 2007 jyldan bastap dáriger AQSh-tyń Cincinnati Children's Hospital Medical Center qurmetti professory boldy, 2007 jyldan bastap eýropalyq jaratylystaný ǵylymdary akademııasynyń múshesi boldy. 2016 jyly Robert Koh atyndaǵy medalmen, 2017 jyly ǵylymǵa qosqan úlesi úshin Aleksandr III ordenimen marapattaldy.
Alǵashqylardyń biri bolyp jalpy hırýrgııa boıynsha (Nıý-Iork q., AQSh, 2004), balalar koloproktologııasy boıynsha (Tsıntsınatı q., AQSh, 2006) jáne ýltradybystyq skalpeldi ıgerý boıynsha (Máskeý q.), laporoskopııalyq hırýrgııa boıynsha (Sankt-Peterbýrg q.) taǵylymdamadan ótti.
N.Aqparov AQSh-ta taǵylymdamadan ótkennen keıin TMD-da birinshi bolyp anorektaldy aımaqta (ish qýysy músheleriniń qatersiz jáne qaterli isikteri) operatsııalar jasaı bastady. Reseıde mundaı operatsııalar Qazaqstannan bir jarym jyl ótken soń ǵana engizildi.
Nurlan Aqparov 2018 jyly medıtsına ǵylymyna qosqan úlesi úshin Aleksandr III Eýropa ordenimen marapattaldy. Bul marapatty álem boıynsha tek 17 adam aldy. Joǵary marapat «EuroMedica-2018» (Hannover, Deutschland) Eýropalyq kongresinde berildi. Al 2008 jyly medıtsına men ǵylymǵa sińirgen eńbegi úshin Qazaqstan metsenattar klýbynyń «Ilham» respýblıkalyq syılyǵynyń laýreaty atandy, 2009 jyly minsiz eńbegi men adal eńbegi úshin «Halyq batyry» syılyǵynyń laýreaty boldy. Bilikti hırýrg «Qazaqstan Respýblıkasy Densaýlyq saqtaý isiniń úzdigi» (2005), «Úzdik qyzmetker», «Úzdik ǵalym» tósbelgilerimen jáne kóptegen marapattardyń ıegeri atandy.
