Tanymal ánshi Darkhan Juzz Taılandta jol apatynan qaza tapty

ASTANA. QazAqparat - Darkhan Juzz sahnalyq atymen belgili otandyq ánshi Darhan Júnisbekov ómirden ótti, dep habarlaıdy QazAqparat.

Ónerpazdyń ómirden ozǵanyn Qazaqstannyń Syrtqy ister mınıstrligi rastady.

«Taıland polıtsııasynyń málimetine sáıkes, 24 aqpanda Phýket aralynda Qazaqstan azamaty Darhan Djýnýsbekov qaıtys boldy. Jerlesimizdiń ólimine mopedpen bolǵan jol kólik apaty sebep boldy. Qazir máıitti Qazaqstanǵa jetkizý úshin qajetti qujattardy resimdeý boıynsha jumys júrgizilip jatyr», - dedi Syrtqy ister mınıstrliginiń resmı ókili Aıbek Smadııarov.

Otandasymyz 31 jasta bolatyn.

REP oryndaýshy, óleńder avtory ári saýnd-prodıýser Darhan Júnisbekov (Darkhan Juzz) 1991 jyly 9 tamyzda Almaty qalasynda dúnıege kelgen.

Ol án shyǵarýmen 14 jasynan bastap aınalysqan.

Jerlesimizdiń shyǵarmashylyǵy klassıkalyq trep, akýstıkalyq gıtara jáne sezimtal lırıkany biriktiredi.

Ánshiniń baqul bolýyna baılanysty Memlekettik keńesshi Erlan Qarın kóńil aıtty.

«Qaraly habar estigende tóbemizden jaı túskendeı boldyq. Daryndy ánshi Darkhan Juzz Darhan Júnisbekov ómirden ótipti. Darhan qazirgi zamanǵy qazaq mýzykasynyń jarqyn ókili edi. Jarqyrap janyp kele jatqan juldyzdyń mezgilsiz aǵyp túskeni qabyrǵamyzdy qaıystyrdy. Eline bergeninen bereri kóp, qazaq mýzykasyn damytýǵa úlken úles qosatyn azamat bolatyn. Amal neshik, ajal ony aramyzdan erte alyp ketti. Aldyń jaryq, topyraǵyń torqa bolsyn, Darhan! Seniń jarqyn beıneń ónerińdi qadirleıtin jurttyń júreginde máńgi saqtalady!», - dep jazdy E. Qarın Instagram paraqshasynda.