Tanymal ánshi alaıaqtyq jasady dep aıyptalýda
ASTANA. QazAqparat - Elge tanymal ánshi qarjylyq uıym quryp, alaıaqtyq jasaǵany úshin aıyptalýda, dep habarlaıdy Elorda Info.
Búgingi kúni Astana qalasy Polıtsııa departamentiniń tergeý basqarmasynda Qazaqstan Respýblıkasy QK-niń 190 baby 3-bóligi 1-tarmaǵymen (alaıaqtyq) qylmystyq isti tergep-tekserý júrgizilip jatyr. Atalǵan qylmystyq isti tergep-tekserý barysynda 2018 jyldyń shilde aıynyń bas kezeńinde «Ó» degen azamatsha («Aqjaınaq» dep elge tanylǵan halyq ánin oryndaýshy, elge tanymal ánshi) óziniń ál aýhaty tómen otbasylarǵa, múgedekterge, jalǵyz basty analarǵa jáne t.b., materıaldyq turǵydan jaǵdaıy tómen adamdarǵa kómek bergisi keletindegin aıtyp, «Aqjaınaq» dep atalatyn qarjylyq uıym qurǵan.
«Bul qarjylyq uıymda ár qatysýshy shamasyna qaraı 20 000 teńgeden bastalatyn qarajat salý arqyly 5-10 kúnniń ishinde óz artynan 2 adam alyp kelgen jaǵdaıda salǵan 20 000 teńgesi eki eselenip, 40 000 teńgege ósip otyrǵan. Eger taǵy da alyp kelgen eki adamnan bólek eki adam tartyp otyrsa, sol bastapqy salǵan 20 000 teńgesin esh qıyndyqsyz alyp otyrǵan. Osylaısha atalǵan uıym 2018 jyldyń tamyz aıynyń bas kezeńine deıin jalǵasyp, nátıjesinde birneshe adamǵa materıaldyq shyǵyn keltirilgen» delingen habarlamada.
Aldyn ala tergeý barysynda anyqtalǵandaı, 2018 jyldyń 17-18 shildesine deıin aqsha salǵan adamdar óz aqshalaryn ósimmen eki eselep alyp, keıingi salǵan adamdar aqshasyz qalyp otyr.
Alaıaqtyq dereginiń jáne alaıaqtardyń qurbany bolmaý maqsatynda Qazaqstan Respýblıkasy azamattarynyń qaperine telefon arqyly belgisiz tulǵalardyń ártúrli usynymdaryna senbeýge, adamdardyń jáne uıymnyń zańdy qujattaryna kóz jetkizbeı, memlekettik uıymdardan zańdylyǵyn teksermeı jatyp, eshqandaı aqsha jáne qundy zattar usynbaýdy suraıdy.
