«Tanymal ánniń tarıhy» Qytaı úkimetiniń tapsyrysymen Shyńjań halyq baspasynda jaryq kórdi

«Aıqyn» respýblıkalyq qoǵamdyq-saıası gazetiniń mádenıet bólimi redaktorynyń bul jınaǵy Qytaı úkimetiniń tapsyrysymen «Shyńjań halyq baspasynda» tóte jazý qarpimen basylyp otyr.  Oǵan uıytqy bolǵan Ólkelik «Shyńjań» gazeti qazaq redaktsııasynyń redaktory, aqyn-aýdarmashy Jaıyrbek Muhamedhanuly.

Bul kitapta «Aıqyn» gazetinde  2007-2009 jyldary jarııalanǵan  80 tanymal ánniń tarıhy baıandalady. Olardyń arasynda Nursultan Nazarbaevtyń óleńine jazylǵan  «Úshqońyr», «Saryarqa», «Elim meniń» ánderi, sondaı-aq Shámshi Qaldaıaqov, Qadyr Myrza Áli, Tumanbaı Moldaǵalıev, Іlııa Jaqanov, Áset Beıseýov, Muqaǵalı Maqataev, Esenqul Jaqypbek, Israıl Saparbaı, Eskendir Hasanǵalıev, Tólegen Muhamedjanov, Keńes Dúısekeev, Shómishbaı Sarıev, Muhtar Shahanov, Muzafar Álimbaev, syndy aqyndar men kompozıtorlardyń týyndylary bar.

Qytaı, uıǵyr, qazaq, mońǵol, qyrǵyz tilinde kitap-jýrnaldar shyǵarýmen aınalysatyn  «Shyńjań halyq baspasy» bul ólkedegi eń baıyrǵy jáne eń iri baspa sanalady. Onda  buǵan deıin «Abaı joly»,  «Móldir mahabbat», «Qan men ter», «Quz basyndaǵy ánshiniń zary», «Qajymuqan», «Ataýkere», «Mynaý appaq dúnıe», «Kók bórilerdiń kóz jasy», «Jambyl jyrlary», «Dáýir dastandary», «Ár kún - araıly tań», «Júrek demin alǵanda», «Men saǵan ǵashyq emes em», «Saǵynysh sazy», «Rústem-Dastan», «Qutty bilik» sııaqty kitaptar men qazaq tiliniń túsindirme sózdikteri jaryq kórgen bolatyn.