Tanymal akter Rahman Omarovtyń burynǵy áıeli páter jaldaýshylardyń qolynan qaza tapty
ALMATY. QazAqparat - Almatyda belgili akter, telejúrgizýshi Rahman Omarovtyń birinshi áıeli Gúlderaıym Omarova kisi qolynan qaza tapty. Áıel páteraqysyn alýǵa barǵan kezde ony páter jaldap turǵan áıelder pyshaqtap tastaǵan, dep habarlaıdy QazAqparat tilshisi.
Qaıǵyly oqıǵa týraly otbasynyń ónerdegi joldasy Qaragóz Súleımenova Instagramdaǵy paraqshasynda jarııalady.
«Janymyz qulazyp, júregimiz jylap otyr. Orny tolmas qaza. Dúısenbi kúni Gúlderaıym Omarovadan aıyrylyp qaldyq. Tapa-tal túste kisi qolynan qaza tapty. Zamannyń aıýandalǵany sonshalyq, kvartıranttarynan aqsha alýǵa barǵanda 30-dyń tóńiregindegi eki áıel pyshaqtap óltirgen. Alla jazalaryn bersin. Minezge baı, kópshil, tárbıeli, qazaqtyń danagóı qyzdarynyń biri edi. Óte kishipeıil, asa ınabatty, jaıdary júzi kóńilimizden ketpeıdi», - dedi Qaragóz Súleımenova.
Marqumnyń denesi keshe jer qoınyna tapsyryldy.
Aıta ketý kerek, Gúlderaıym Omarovanyń artynda úsh uly qaldy.
«Tuńǵyshtarynyń atyn Rahman ekeýi Doshan dep qoıyp edi. Ol bala Chehııada ekinshi kýrsty aıaqtady. Ekinshi uly mektep bitirdi. Kenjesi 8 jasta. Rahman Omar ekeýiniń ómir joldary kóz aldymyzda ótti. Ómir boıy eriniń abyroıyn asqaqtatyp, azamattaryna talmaı tárbıe berdi. Búgin jer qoınyna tapsyrdyq. Allanyń qalaýy bolar, ortamyzdan mezgilsiz ketti. Artynda qalǵan uldaryna anasynyń kórmegen qyzyǵyn, jasamaǵan jasyn bersin. Allanyń buıryǵyna amal joq. Jatqan jeri jaıly, topyraǵy torqa bolsyn. Jany jánatta bolǵaı. Aldy peıish, arty kenish bolsyn. Allam urpaqtaryna ómir bersin. Máńgi júregimdesiń», - dedi Qaragóz Súleımenova.
Ázirge qalalyq ІІD atalǵan derekke baılanysty túsinikteme bermedi. «QazAqparat» atalǵan oqıǵaǵa baılanysty qalalyq ІІD-ge saýal joldady.
