Tanymal akter Farhat Ábdiraıymov balalar úıindegi Jańa jyldyq merekege qatysty
NUR-SULTAN. QazAqparat - «Qazaqfılm» kınostýdııasy balalar úıiniń tárbıelenýshilerin kele jatqan Jańa jyl merekesimen quttyqtady. Bul jaıynda QR Mádenıet jáne sport mınıstrliginiń baspasóz qyzmetinen málim etti, dep habarlaıdy QazAqparat tilshisi.
Vedomstvo málimetinshe, búgin tanymal akter Farhat Ábdiraıymov bastaǵan «Qazaqfılm» kınostýdııasynyń delegatsııasy Almatydaǵy №1 balalar úıinde ótken Jańa jyldyq merekege qatysty.
«Farhat Ábdiraıymov balalardy kele jatqan Jańa jyl merekesimen quttyqtap, olarǵa «Qazaqfılm» kınostýdııasynyń úzdik týyndylary jáne anımatsııalyq fılmderi kirgen antologııasyn, Sh. Aımanov týraly kitaptar men tátti taǵamdardy tartý etti. Balalar úıiniń tárbıelenýshileri Farhatpen sýretke tústi, - dep atap ótedi mınıstrlikten.
