Tańsyq biraq dámdi - nemis jastary qazaqsha daıyndalǵan ettiń dámin tatty
ASTANA. QazAqparat - Qazaqstandaǵy Germanııa elshiliginiń praktıkanttary qazaqtyń ulttyq taǵamdarynan aýyz tıip, óz áserlerimen bólisti, dep habarlaıdy QazAqparat.
Beınerolıkti Qazaqstandaǵy Germanııa elshiligi Facebook jelisinde jarııalady.
«Qazaqtyń ulttyq ashanasy alýan túrli jáne kóptegen sheteldik qonaqtardy tańǵaldyrady. Biz jańa praktıkanttarymyzdy qazaq taǵamdaryn jeýge shaqyrdyq jáne pikirlerin suradyq. Jas germanııalyqtar qazaqtyń kóptegen taǵamyn unatty. Tek qymyzǵa úırený úshin olarǵa biraz ýaqyt qajet», - dep jazylǵan elshilik jazbasynda.
Qazaqstanǵa úsh aılyq tájirıbege kelgen Djamılla qymyzdyń dámin aıran, prosekko (sharap) jáne bekonnyń qospasyna uqsatty.
Onyń áriptesi Benıamın Lange «jaqsy» dep ustamdyraq jaýap berdi. Qymyzǵa qaraǵanda Benıamınge shubat kóbirek unaǵan tárizdi.
Baýyrsaqty eki qonaq ta qosh kórdi. «Barlyq qýyrylǵan taǵam dámdi bolady. Baýyrsaq ta dámdi», - dedi Djamılla.
Sonymen birge, qonaqtarǵa til, bekire balyqtan jasalǵan qazy, kespe kóje men qýyrdaq usynyldy.
«Ádettegi kesilgen qamyry bar kóje, tek ishinde shujyǵy bar. Bul qazy shyǵar», - dedi Djamılla.
Aqyrynda dastarhanǵa qazaqsha et keldi jáne qonaqtar óz tańdanysyn jasyrmady.
«Dámi bizge tańsyq, biraq til úıiredi», - dedi sheteldik qonaqtar.
