Tańmen talasa eńbekke kirisetin Janat Mustafın — jumysshy mamandyqtyń jarqyn úlgisi
ASTANA. KAZINFORM — Memleket basshysynyń bastamasymen 2025 jyl elimizde «Jumysshy mamandyqtar jyly» dep jarııalandy. Osyǵan oraı elimizdiń ár óńirinde qarapaıym eńbek ıeleriniń qyzmeti men qoǵamdaǵy róline erekshe kóńil bólinip otyr.
Solardyń biri — «Oqjetpes» shıpajaıynyń eńbeksúıgish qyzmetkeri Janat Mustafın.
Janat Mustafın 2016 jyldan beri «Oqjetpes» shıpajaıynyń aýmaǵyn taza ustaýǵa jáne kórikti kúıde saqtaýǵa óz úlesin qosyp keledi. Ol — mekemeniń eń senimdi ári jaýapkershiligi joǵary qyzmetkerleriniń biri.
Qarapaıym, biraq asa mańyzdy mindetti minsiz atqaryp júrgen Janat Mustafın tań shapaǵy atpaı turyp, kúndelikti jumysyn bastap ketedi. Gúlzarlardy retke keltirip, jaıaý júrginshi joldaryn tazartyp, demalýshylar úshin jaıly ári taza orta qalyptastyrýǵa talmaı eńbek etedi. Onyń adaldyǵy men tynymsyz eńbeginiń arqasynda «Oqjetpes» shıpajaıy jyl saıyn kelýshilerdi tabıǵat kórkemdigimen ǵana emes, minsiz tazalyǵymen de qýantady.
Aıta keteıik, Janat Mustafın tek aýla tazalyǵyna jaýapty qyzmetpen shektelmeıdi. Buǵan deıin ol qurylys bóliminde, kúzet qyzmetinde jáne ınjenerlik-sharýashylyq baǵytta da eńbek etip, jan-jaqty maman ekenin dáleldegen. Túrli salada jınaǵan tájirıbesi men eńbekqor minezi onyń ujymdaǵy bedelin arttyra túsken.
Úsh balanyń ákesi Janat Mustafın otbasynda da tazalyq pen tártipke mán berip, balalaryna úlgi kórsetip keledi.
– Shıpajaıdyń aýmaǵy — meniń jaýapkershiligim. Demalýshylar jaıly jaǵdaıda júrgenin kórgende, eńbegimniń zaıa ketpegenin túsinemin. Aýla taza bolsa — kóńil taza, – deıdi Janat Mustafın.
«Oqjetpes» shıpajaıynyń ujymy Janat Mustafındi maqtan tutady. Ol — jumysshy mamandyqtyń abyroıyn bıiktetip júrgen naǵyz eńbek adamy. Mundaı qarapaıym eńbek ıelerin dáripteý — bolashaq urpaqqa úlgi bolmaq.