Tank pýlemeti, vıntovka, revolver: Polıtsııaǵa qandaı antıkvarlyq qarý tapsyrylady
NUR-SULTAN. QazAqparat – QR ІІM Ákimshilik polıtsııa komıtetiniń bólim bastyǵy Asylbek Ydyrysov quqyq qorǵaý organdaryna osy ýaqytqa deıin tarıhı qundylyǵy bar qandaı qarýlar tapsyrǵanyn aıtty, dep habarlaıdy QazAqparat tilshisi.
«Antıkvarlyq jáne tarıhı qundylyǵy bar qarý krımınalıstıkalyq bólimshelerdiń zattaı kollektsııalaryna nemese Іshki ister mınıstrliginiń murajaılaryna berilýi múmkin. Máselen, Shyǵys Qazaqstan oblysynda 2012 jyly erikti túrde UOS kezinen qalǵan 12,7 mm kalıbrli «Nıkonov-Semenov-Vladımırovskıı-Tankovyı» markaly tank pýlemeti tapsyryldy», - dedi ol.
Onyń atap ótýinshe, Semeı qalasynda 1882 jyly Italıada shyǵarylǵan 32 kalıbrli «Vetterlı-Vıtalı» vıntovkasy men «Lefoshe» revolveri, agenttik jumystarǵa arnalyp, 1936 jyly shyǵarylǵan kalıbri 6,5 mm-lik «TOZ» oıyq uńǵyly tapanshasy tapsyrǵan. Al Soltústik Qazaqstan oblysynyń turǵyny polıtsııaǵa «Pıstolet-pýlemet Shpagına» tapanshasyn ótkizgen.
«Pavlodar oblysynda 1891 jyly shyǵarylǵan «Frolov» konstrýktsııasynyń tegis uńǵyly atys qarýynyń kesindisi ótkizildi. Bul qarý túrleri eksponat retinde polıtsııa departamentteriniń murajaılaryna berildi», - dedi Asylbek Ydyrysov.
Aıta keteıik, 20 sáýirde elimizde halyqtan zańsyz qarý-jaraqtardy satyp alý aktsııasy bastalady. Oǵan bıýdjetten 95 mln teńge bólinip otyr.
