Tanysyn óltirip, denesin qoqys mańyna tastap ketken aqtóbelik 14 jylǵa sottaldy
AQTÓBE. KAZINFORM — Sot ishimdik iship, adam óltirgen aqtóbelikke 2 mln teńge moraldyq shyǵyn óndirýdi mindettedi. Kinásin moıyndap, polıtsııaǵa ózi barǵany eskerilip, jeńildetetin mán-jaı dep tanyldy.
Aqtóbe oblystyq qylmystyq ister jónindegi mamandandyrylǵan aýdanaralyq sotynda 63 jastaǵy sottalýshyǵa úkim shyqty. Іs bir aptaǵa jeter-jetpes ýaqyt ishinde qaraldy.
— Sottalýshy kinásin ishinara moıyndap, polıtsııa bólimine ózi barǵan. Al sot otyrysynda qasaqana qazaǵa ushyratqanyn moıyndaǵan joq. Ekeýi tóbelesip qalǵanyn, aralarynda kıkiljiń bolǵanyn, jábirlenýshi pyshaqpen umtylǵanda qaıyryp, ishine kirgenin aıtty. Odan keıingi jaǵdaı esinde joq. Máıit úıinde eki táýlikten asa ýaqyt jatqan. Eshkimge habar bermegen. Iis shyqqan soń ǵana máıitten qutylýdy oılaǵan. Qysta shana taýyp ákelip, máıitti búktep, aıaq-qolyn skochpen orap, sómkege salyp, izin jasyrǵysy kelgen. Jınaqtalǵan derekpen aıyp óz dálelin tapty. Qylmystyq kodekstiń 99-baby 1-bóligimen aıypty dep tanylyp, 14 jylǵa bas bostandyǵynan aıyrý jazasy taǵaıyndaldy, — dedi sýdıa Jánibek Seıitjaparov.
Sottalýshy jábirlenýshi tarapqa 2 mln teńge moraldyq shyǵyndy óteýge mindetti. Jazasyn qylmystyq atqarý júıesiniń qaýipsizdigi ortasha mekemesinde óteıdi.
Eske salsaq, qoqys mańynan er adamnyń denesi tabylǵany jónindegi aqparat bıyl 12 naýryzda belgili boldy.
Arada bes kún ótkende kúdikti ustaldy.
