Táńirbergen Berdiońǵarov Astananyń jańa temir jol vokzaly qurylysymen tanystyrdy
ASTANA. QazAqparat - Burynǵy Májilis depýtaty Táńirbergen Berdiońǵarov óziniń blogynda Astananyń jańa temir jol vokzaly qurylysy barysy beınelengen vıdeony jarııa etti, dep habarlaıdy QazAqparat.
«Dál qazirgi ýaqytta bul vokzaldyń aýqymy shyn máninde adamdy tań qaldyrady. Menińshe, bul Astanadaǵy eń aýqymdy ǵımarattardyń biri sııaqty. Josparda 120 myń sharshy metr aýmaq salý kózdelgen jáne bul nysan 2017 jyldyń mamyr aıynda paıdalanýǵa berilmek. Búgingi kúni vokzal qurylysyna 1400 adam tartylǵan. Onyń 95 paıyzy Qazaqstan Respýblıkasynyń azamattary. Al qalǵan 5 paıyzy túrikter. Olar túriktiń Sımbol qurylys kompanııasynyń mamandary», - dedi ol.
Sonymen qatar Berdiońǵarov 7 qabatty vokzal ǵımaratynyń ishin de kórsetedi. Vokzaldyń jabyq ǵımaratyna bir mezgilde 6 poıyz qatarynan kire alady. Táýligine 35 myńǵa jýyq jolaýshyǵa qyzmet kósretýge qaýqarly ǵımarat 26 jedel satymen, 52 eskalatormen jabdyqtalǵan.
«Qazaqstanǵa temir jol qatynasymen kelgen týrıster dál osy jerden túsip, vokzalǵa tańǵalady. Avtomobılge, baǵdar avtobýstaryna nemese jeńil relsti kólikke otyryp EKSPO-ǵa qaraı nemese qalany kórýge baǵyt alady. Shynymdy aıtsam, eger men týrıst bolsam, tek osy temir jol vokzalyn kórgennen keıin-aq keri poıyzǵa otyryp, elime qaıtar edim. Óıtkeni, temir jol vokzalynyń ózi ǵana adamdy tańǵaldyrady», - dedi Táńirbergen Berdiońǵarov.
