Tanymal jekpe-jek sheberi Fedor Emelıanenko Qazaqstanǵa keledi
ASTANA. KAZINFORM – Aralas jekpe-jek sheberi Fedor Emıanenko 2 mamyrda Almatyda Balýan Sholaq atyndaǵy Arenada ótetin Alash Pride FC 96 nómirli týrnıriniń qurmetti qonaǵy bolady.
Belgili sport fýnktsıoneri jáne Alash Pride promoýsheniniń negizin qalaýshy, al qazir QR Parlamenti Májilisiniń depýtaty Danııar Qasqaraýov jankúıerlerdi Qazaqstan, sondaı-aq alys-jaqyn shetelderden keletin ataqty sportshylar óner kórsetetin shoý kútip turǵanyn aıtty.
- QR Parlamenti Májilisiniń depýtaty bolyp saılanǵaly beri «Alash Praıd» klýbyn basqarýdy Álimjan Bektaevtyń qolyna tapsyrdym. Ol uzaq jyldar boıy otandyq sporttyń damýyna úles qosyp keledi. Bizdiń jaýyngerler elimizde de, shetelde de turaqty túrde jekpe-jek ótkizedi. Aldaǵy týrnır birneshe sebeppen erekshe bolady dep ýáde berdi. Birinshiden, myqty kard bolady. Maqsat Esbolatov, Nesipbaı Muqaǵalı, Dosqalı Áshirov, Raýan Bekbolat Brazılııa, Reseı jáne Ózbekstannan kelgen myqty qarsylastarmen judyryqtasady. Sondaı-aq basqa da kóptegen qyzyqty shaıqastar bolady. Ekinshiden, jankúıerler álemniń úzdik MMA juldyzdaryn óz kózderimen kóre alady. Onyń ishinde ataqty Fedor Emelıanenko da bar. Mundaı dárejeli adamnyń kelýi qazirdiń ózinde MMA jankúıerleriniń qyzyǵýshylyǵyn arttyryp, jekpe-jek ónerin odan ári tanymal etedi dep senemin. Týrnır eshkimdi beı-jaı qaldyrmaıtynyna jáne onyń sońynda kórermender jaǵymdy jáne umytylmas áserge ıe bolatynyna senimdimin», - dedi Danııar Qasqaraýov.
1 mamyrda týrnırdiń uıymdastyrýshylary men Fedor Emelıanenkonyń Qazaq sport jáne týrızm akademııasynyń stýdentterimen kezdesýi josparlanǵan, onyń barysynda Fedor sheberlik sabaǵyn ótkizip, jankúıerlerdiń suraqtaryna jaýap beredi.
