Tanymal vıolonchelıst Bolat Tynybekov mezgilsiz dúnıeden ótti
ASTANA. KAZINFORM – Tanymal vıolonchelıst Bolat Tynybekov mezgilsiz dúnıeden ótti. Qaraly habar «Bolashaq» qaýymdastyǵynyń Instagram paraqshasynda jarııalandy.
«Bolashaq» qaýymdastyǵy Bolat Tynybekovtyń mezgilsiz dúnıeden ótýine baılanysty onyń otbasy men jaqyndaryna ortaqtasyp kóńil aıtady. Bolat Tynybekov — qazaqstandyq vıolonchelıst jáne vokalıst, Koroldik mýzyka kolledjiniń túlegi. Halyqaralyq konkýrstardyń laýreaty retinde ol Qazaqstan men Eýropada belsendi kontserttik qyzmet júrgizip, óz elin álemdik sahnada tanytqan», - delingen qaýymdastyq taratqan aqparatta.
Bolat Tynybekov Qaraǵandy qalasynda 1985 jylǵy 24 shildede dúnıege kelgen. Kúlásh Baıseıitova atyndaǵy daryndy balalarǵa arnalǵan respýblıkalyq orta mamandandyrylǵan mýzykalyq mektebin bitirgen.
«Bolashaq» baǵdarlamasynyń túlegi, Londondaǵy Koroldik mýzyka kolledjinde professor A.Boıarskııdiń synybynda bilim alǵan. Almaty qalasynda mýzykalyq mektepte sabaq berdi.
