Tanymal ýkraınalyq boksshy Jánibekti jeńisimen quttyqtady

ASTANA. KAZINFORM – Sıdneıde ótken kásipqoı boks keshinde IBF jáne WBO tujyrymdary boıynsha álem chempıony ataǵyn qorǵaǵan qazaqstandyq Jánibek Álimhanulyna (16-0, 11 KO) tanymal ýkraınalyq boksshy Aleksandr Ýsık habarlasty. Bul týraly Sports.kz jazdy. 

Asa aýyr salmaqtaǵy álem chempıony Aleksandr Ýsık qazaqstandyq boksshy Jánibekke kezekti jeńisinen soń vıdeobaılanys arqyly habarlasyp, kezekti jeńisimen quttyqtady. 

«Baýyrym, jeńisińmen quttyqtaımyn. Alǵan baǵytyńnan taıǵan joqsyń. Seni meniń komandam da quttyqtap jatyr», - dedi Ýsık. 

Óz kezeginde Jánibek ýkraınalyq boksshyǵa alǵysyn bildirdi. 

Aıta keteıik, Sıdneıdegi boks keshinde Álimhanuly jańazelandııalyq Andreı Mıhaılovıchti 9-raýndta nokaýtpen jeńdi. Osylaısha, Jánibek Álimhanuly kásibı mansabyndaǵy on altynshy jekpe-jegin jeńispen aıaqtap, IBF jáne WBO tıtýldaryn sátti qorǵady. Al Andreı Mıhaılovıch mansabyndaǵy alǵashqy jeńilisine ushyrady.