Tanymal sportshylarǵa jańa Konstıtýtsııanyń arnaıy basylymy tabystaldy
ASTANA. KAZINFORM — Týrızm jáne sport mınıstrliginde Qazaqstannyń jańa Konstıtýtsııasynyń arnaıy basylymy tabys etildi.
Іs-sharaǵa qatysýshylarǵa Konstıtýtsııanyń arnaıy danalaryn Týrızm jáne sport mınıstri Erbol Myrzabosynov tartý etti.
Vedomstvonyń málimetinshe, estelik basylym sport salasynyń ókilderine, sport uıymdarynyń basshylaryna, tanymal sportshylar men sport ardagerlerine, sondaı-aq týrızm salasynyń damýyna eleýli úles qosqan mamandar men sala ókilderine berildi.
Mınıstr jańa Konstıtýtsııa Ádiletti Qazaqstandy qurý jolyndaǵy mańyzdy qadam ekenin jáne onda zań ústemdigi, jaýapkershilik pen qoǵamdyq birlik qaǵıdattary aıqyn kórinis tapqanyn atap ótti. Sondaı-aq Konstıtýtsııany qurmetteý — memlekettiń ornyqty damýynyń negizi ekenin, al árbir azamat óz eńbegi arqyly eldiń nyǵaıýyna úles qosatynyn aıtty.
— Konstıtýtsııa — memlekettigimizdiń berik tuǵyry, eldiń strategııalyq damý baǵytyn aıqyndaıtyn ári árbir azamattyń quqyqtaryna kepildik beretin basty qujat. Ádildik, zańdylyq jáne jaýapkershilik qaǵıdattary memlekettik ınstıtýttardyń qyzmetinen bólek, kúndelikti ómirde, sonyń ishinde sport pen týrızm salalarynda da naqty kórinis tabýy mańyzdy. Zańǵa qurmet, adal eńbek jáne elge qyzmet etý — qýatty ári órkenıetti Qazaqstannyń berik negizi, — dedi Erbol Myrzabosynov.
Eske sala keteıik, Qazaqstan Respýblıkasynyń jańa Konstıtýtsııasy 2026 jylǵy 15 naýryzda ótken respýblıkalyq referendýmnyń qorytyndysy boıynsha qabyldanyp, 1 shildeden bastap kúshine endi.
Budan buryn Abaı oblysynda jańa Konstıtýtsııanyń resmı basylymyn tabystaý rásimi ótkenin jazdyq.
