Tanymal sáýlet eskertkishteriniń «egizderin» qaıdan kórýge bolady
ASTANA. KAZINFORM – Frantsııadaǵy Lývr mýzeıindegi urlyq oqıǵasy men Telegram negizin qalaýshy Pavel Dýrovtyń áleýmettik jelide jazǵan ıronııalyq jazbasynan keıin jeli qoldanýshylary álemdegi áıgili nysandardyń «kóshirmelerine» qyzyǵýshylyq tanyta bastady. Kazinform álemniń túkpir-túkpirinde ornalasqan eń tanymal sáýlet týyndylarynyń «egizderi» týraly baıandaıdy.
Parıjdegi «Bostandyq músini»
1886 jyly ashylǵan Nıý-Iorktegi Bostandyq músini AQSh-tyń eń tanymal sımvoldarynyń biri. Bul eskertkish - Frantsııanyń AQSh halqyna dostyq belgisi retinde syıǵa tartqan týyndysy.
Al 1889 jyly Parıjde onyń 11,5 metrlik shaǵyn kóshirmesi ornatyldy. Bul syılyq Frantsýz revolıýtsııasynyń júz jyldyǵyna arnaldy.
AQSh-taǵy «Stoýnhendj»
Aǵylshyn Ýıltshır graftyǵyndaǵy túpnusqa Stoýnhendjge shamamen bes myń jyl bolǵan. Onyń álem boıynsha birneshe kóshirmesi bar. Solardyń biri — Vırdjınııa shtatyndaǵy «Foamhendj», ıaǵnı polıstıroldan jasalǵan tolyq ólshemdegi nusqa. Ol 2004 jyly 1 sáýirde ázil retinde salynyp, týrısterdiń súıikti ornyna aınalǵan.
Kýbadaǵy «Kapıtolıı»
AQSh Kapıtolııiniń irgetasy 1793 jyly Djordj Vashıngtonnyń qatysýymen qalanǵan.
Al Gavanadaǵy Kýba Kapıtolııi — túpnusqaǵa eń dál keletin kóshirmelerdiń biri. 1926-1929 jyldary salynǵan ǵımarat bastapqyda parlament úıi bolǵan, keıin ǵylym akademııasy men ulttyq kitaphana ornalasqan. 2018 jyldan bastap munda Kýba halyq bıligi Ulttyq assambleıasy óz májilisterin ótkizedi.
Makaodaǵy «Kolızeı»
B.z. 80 jyly turǵyzylǵan Rım Kolızeıi — ejelgi sáýlet óneriniń uly týyndysy.
Al onyń shaǵyn kóshirmesi Qytaıdyń arnaıy ákimshilik aýdany Makaoda ornalasqan. 2 000 adamǵa arnalǵan amfıteatr kontsertter men mádenı sharalar ótkizýge paıdalanylady. Ǵımarat túpnusqanyń beınesin dál saqtap, tipti VII ǵasyrdaǵy jer silkinisinen keıingi «jarylǵan» bólikterin de qaıtalaǵan.
Portýgalııadaǵy «Qutqarýshy Hrıstos músini»
Rıo-de-Janeırodaǵy ataqty Hrıstos músini 1931 jyly turǵyzylǵan. Onyń eń tanymal kóshirmesi Portýgalııanyń Almada qalasynda, Lıssabon mańynda ornalasqan.
1959 jyly ashylǵan Hrıstos-Patsha qasıetti mekeni 28 metr bıiktikte, al tuǵyry 82 metrdi quraıdy. Ol da óz qalasynyń ústinen kórinip turatyn bıik nysan sanalady.
Hanchjoýdaǵy «Eıfel munarasy»
Qytaıdyń Hanchjoý qalasy mańynda Parıjdiń rýhy seziledi. Munda 108 metrlik Eıfel munarasynyń kóshirmesi boı kótergen. 2007 jyly paıdalanýǵa berilgen joba búginde qalanyń kórkine aınaldy. Munaranyń aınalasynda frantsýz úlgisindegi shaǵyn aýdan bar — naýbaıhanalar, kafeler jáne parıjdik úıler fasady.
Shanhaıdaǵy «Pıza munarasy»
Shanhaıdyń turǵyn aýdandarynyń birinde Italııadaǵy áıgili Pıza munarasynyń kóshirmesi ornalasqan. Túpnusqadan tórt ese alasa munara 7,1 gradýs buryshpen salynǵan, bul oǵan aıqyn tanymaldyq beredi.
Ol tek kórikti nysan ǵana emes, eýropalyq stıldegi turǵyn keshenniń bir bóligi.
Kazinform habarlaǵandaı, Lývrdaǵy urlyqty Parıjdiń shet aımaqtaryndaǵy qylmystyq toptardyń músheleri uıymdastyrǵany anyqtalǵan.