Tanymal rejısserdiń tazy týraly derekti fılmi jaryqqa shyqty
ALMATY. KAZINFORM – Rejısser Qanat Beısekeev Qazaqstandaǵy ańshylyq pen qazaqy ıt tuqymyn saqtap júrgen jandarǵa arnalǵan «Tazy» derekti fılmin kórermenge usyndy.
Fılmniń basty keıipkeri – Rashıd Atambaev. Ol kóp jyldan beri qazaqy tazynyń tuqymyn ósirip, onyń tazalyǵyn saqtaýǵa atsalysyp júrgen janashyrlardyń biri. Rashıd úshin bul jaı ǵana ermek emes, ıt baptaý – ómiriniń bóligine aınalǵan. Ol muny ulttyq muraǵa degen jeke jaýapkershiligi dep túsinedi.
Fılmde keıipkerdiń kúndelikti ómirinen kórinister bar: ol ıtterimen ýaqyt ótkizedi, ańǵa shyǵyp, jarystarǵa qatysady. Rashıd Atambaev Eńbekshiqazaq aýdanyndaǵy baqtardyń birinde basqarýshy bolyp qyzmet etedi. Týyndyda ol tazyǵa degen súıispenshiligin aqtaryla aıtyp, basynan ótken qıyn sátterimen bólisedi jáne osy asyl tuqymdy ıtterdiń arqasynda tyǵyryqtan shyqqanyn jasyrmaıdy.
– Tazy – men úshin asa mańyzdy. Olar – meniń aınymas dosym, senimdi kómekshim, tipti jan dúnıem desem de bolady. Olardy óz otbasymdaı kóremin. Osy ıtterdiń arqasynda tabıǵatqa jaqyndaı tústim: buryn qyr men taýdan qashsam, qazir ony shyn júrekpen jaqsy kóremin, - deıdi keıipker.
Rashıd Atambaevtyń aıtýynsha, ol tazy ósirýdi 2017 jyly bastaǵan. Basynda bul ispen myqtap aınalysamyn degen oıy bolmapty. Alaıda bir kúni baǵyna tazy erip keledi. Kúni boıy qasynda bolǵan ıtti ol qaldyrýǵa bel býǵan.
– Atyn Bereke dep qoıdyq. Ol meniń alǵashqy tazym boldy. Ýaqyt óte kele kúshiktep, sharýashylyǵym keńeıdi. Qazir qolymda 21 ıt bar. Olardy ańǵa qosamyn, kúnde ózimmen birge baqqa aparamyn. Keıbirimen kórmelerge, shyrǵa tartý sııaqty jarystarǵa qatysamyn. Tazy – óte jýas ári aqyldy janýar, biraq ańǵa shyqqanda minezi kilt ózgerip, naǵyz bolmysyn kórsetedi. Olardy baǵý ońaı emes: aıyna jem-shóbine, ıaǵnı et pen qosymsha azyǵyna shamamen 100 myń teńge jumsalady, - dedi ol.
Rejısser Qanat Beısekeev bul fılmdi túsirý ıdeıasy osydan 5 jyl buryn týǵanyn aıtty. Basynda ol «Jeti qazyna» týraly toptama túsirýdi josparlaǵan. Keıin tazyny kórgende, osy tuqym men ony ósirýshilerge arnap bólek fılm túsirýge bel baılapty.
– Bes jyl buryn keıipker izdep júrip Rashıdpen tanystyq. Sol sátte-aq fılmdi osy kisi týraly túsirý kerek ekenin túsindim. Ol – kóptegen otandasymyz sııaqty kúndelikti tirshiligin keship, qıyndyqtarmen betpe-bet kelip júrgen qarapaıym qazaq. Biraq onyń janyn salyp aınalysatyn isi bar, ol – qazaqtyń qumaı tazysy. Bizdiń týyndy – bul tuqymdy zertteıtin ǵylymı eńbek emes, bul ıtke shyn kóńilimen berilgen jan týraly kórkem-derekti hıkaıa, - dedi rejısser.
Onyń aıtýynsha, fılmniń basty maqsaty – adamdarǵa tórt aıaqty dostaryna meıirimmen qaraý kerektigin eskertý jáne ulttyq qundylyǵymyzdy saqtaýdyń mańyzdylyǵyn uǵyndyrý. Rejısser túsirilimnen keıin óziniń de úsh tazy asyrap alǵanyn aıtty. Tipti onyń biri ulynyń eń jaqyn dosyna aınalyp, rejısserdiń ózine de jańa serpin bergen eken.
Fılm túsirilimi úsh aıǵa sozylǵanymen, daıyndyq kezeńi áldeqaıda kóp ýaqytty alǵan. Qazir týyndy strımıngtik platformalarda kórermenge jol tartty.
Eske salaıyq, buǵan deıin tazy men tóbet týraly ǵylymı derekter bir bazada jınaqtalatynyn jazǵanbyz.
