Tanymal ózbekstandyq ánshi Zeboyi Jahon kisi qolynan qaza tapty
TAShKENT. KAZINFORM – Halyqqa Zeboyi Jahon esimimen tanymal bolǵan ózbekstandyq ánshi Zebınıso Nosırova 26 shildede Samarqand oblysyna qarasty Taılak aýdanynda kóz jumdy, dep habarlaıdy Kazinform agenttiginiń menshikti tilshisi.
Bas prokýratýranyń baspasóz hatshysy Haet Shamsýtdınov 33 jastaǵy kúdikti ustalǵanyn jáne onyń ústinen «Qasaqana kisi óltirý» baby boıynsha qylmystyq is qozǵalǵanyn rastady. Degenmen vedomstvo ókili oqıǵanyń mán-jaıyn ashyp aıtpady.
Bul rette jergilikti buqaralyq aqparat quraldary Zebınıso Nosırovanyń ólimine qatysty iste basty kúdikti marqumnyń jubaıy ekenin jazyp jatyr. «Milliy TV» telearnasynyń málimetinshe, ánshiniń kúıeýi balalaryn kórý úshin úıine barǵan. Keıin erli-zaıypty arasyndaǵy áńgime janjalǵa ulasyp, jubaıy Zebınıso Nosırovany qylǵyndyrǵan. Ánshi oqıǵa ornynda kóz jumdy. Marqumnyń artynda 3 balasy qaldy.
Qosa ketsek, byltyr 10 aıda Ózbekstan sottary turmystyq zorlyq-zombylyq jasaǵan 15 826 adamdy jaýapqa tartty.
Sondaı-aq, 2024 jyly kóp áıel alýdy nasıhattaǵan jáne adamdy jynysyna baılanysty kemsitken 21 ózbekstandyq jaýapqa tartyldy.
Buǵan qosa, byltyr Ózbekstanda balaǵa qatysty jasalǵan turmystyq zorlyq-zombylyq úshin jaza engizildi.