Tanymal ınsaıder qazaq oıynshysynyń «Chelsıǵa» aýysqanyn rastady
ALMATY. KAZINFORM — Tanymal sport jýrnalısi Fabrıtsıo Romano 16 jastaǵy qazaqstandyq fýtbolshy Dastan Satbaevtyń «Chelsıǵa» aýysqanyn habarlady.
Italıandyq jýrnalıstiń málimetinshe, «Chelsı» almatylyq «Qaıratqa» Satpaev úshin 4 mln evro tóleıdi. Bul otandyq lıga úshin rekordtyq kelisim bolmaq.
Dastan Satbaev 2026 jyldyń tamyz aıynda 18 jasqa tolǵan soń, «Chelsıdiń» qataryna qosylady. Ol aǵylshyn klýbymen 1 jylǵa uzartýǵa múmkindigi bar 5 jyldyq kelisimshartqa otyrady.
Aıta ketken jón, 2024 jyldyń mamyr aıynda Sátbaev «Qaırat» komandasynda debıýt jasaǵan eń jas oıynshy retinde tarıhqa endi. Ótken QJ lıgasynda jas fýtbolshy 12 oıynda 19 gol soǵyp, 7 nátıjeli pas berdi. Sondaı-aq Sátbaev maýsymnyń úzdik oıynshysy ataǵyn aldy. Al ÝEFA jasóspirimder lıgasynda (U19) 16 jasar fýtbolshy tórt matchta bir gol soǵyp, bir nátıjeli pas berdi.
Eske salaıyq, buǵan deıin «Manchester Sıtı» klýbyna ózbekstandyq ortalyq qorǵaýshysy Abdýqodır Hýsanov aýysqanyn jazǵanbyz.