Tanymal halyqaralyq agenttik Dımash Qudaıbergen týraly maqala jarııalady
ASTANA. KAZINFORM – 24 elde ókildigi bar Pressenza halyqaralyq baspasóz agenttigi Dımash Qudaıbergen týraly «Álem – onyń kıiz úıi: Dımash jáne polıarızatsııalanǵan álemdegi mádenı dıalog arhıtektýrasy» atty saraptamalyq maqala jarııalady. Bul týraly Dimashnews aqparattyq portaly habarlady.
Pressenza – beıbitshilik, zorlyq-zombylyqqa qarsy, qarýsyzdaný, adam quqyqtary jáne kemsitýshiliktiń barlyq túrlerimen kúreske qatysty jańa bastamalardy qamtıtyn basylym. Mynda kúndelikti jańalyqtar aǵylshyn, ıtalıan, ıspan, frantsýz, portýgal, nemis, grek jáne katalon tilderinde jarııalanady.
Kanadanyń Monreal qalasynyń avtory Klaýdıa Aranda «Álem – onyń kıiz úıi: Dımash jáne polıarızatsııalanǵan álemdegi mádenı dıalog arhıtektýrasy» atty maqalasynda arazdasqan elder arasyndaǵy mádenı kópirlerdiń qalyptasýyna qazaq mýzykantynyń áserin zertteıdi.
– Biz óner fondyq shýǵa aınalǵan dáýirde ómir súrip jatyrmyz. Bir kezderi ónerdiń shyńy bolyp sanalatyn mýzyka ındýstrııa vıtrınalary men sán álemi arasynda qysylyp qaldy.
Osy kontekste janrǵa, tilge, geografııalyq aımaqqa baǵynbaıtyn ártistiń paıda bolýy tek estetıkalyq turǵyda emes, sondaı-aq etıkalyq synaq bolyp sanalady delingen. Ártis sahnada jaı ǵana óner kórsetip qoımaı, eshqashan júzbe-júz kezdespegen adamdardy bir aýdıtorııaǵa jınap, ol jerdi ortaq alańǵa aınaldyrǵanda, kontsertten de bıik deńgeıdiń kýási boldyq, – deıdi maqala avtory.
Klaýdııa Aranda sondaı-aq kókjıegi sheksiz, ejelgi kerýenderdiń jańǵyryǵy qalyp qoıǵan Orta Azııanyń keń jazyǵynda, jylqyny qolǵa úıretken, alma paıda bolǵan jazyq dalada Dımash Qudaıbergenniń dúnıege kelýi, teginiń qazaq bolýy kezdeısoqtyq emes ekenin erekshe atap ótken.
– Dımash tek janrlardy ózgertetin oryndaýshy emes: ol – mádenıetterdiń toǵysqan núktesi. Onyń shyǵarmashylyǵy Qazaqstannyń dalasyn, taýlaryn, ormandaryn eýropalyq opera teatrlarymen baılanystyrady; zamanaýı garmonııalarmen dástúrli áýender; estradalyq mýzykanyń ásemdigi men kameralyq án aıtýdyń jaqyndyǵy nemese dombyranyń qudireti. Onda jergilikti jáne jahandyq álem bir-birine qarama-qarsy emes, kerisinshe olar toǵysyp, qıylysý aımaǵy ekenin eske salady. Dál osy keńistikte onyń daýysy – sózbe-sóz jáne sımvoldyq turǵydan – óziniń eń úlken kúshin tabady. Óıtkeni onyń boıynda qudiretti kúsh bar.
Dımash tereń, belsendi jáne sanalylyqty talap etedi – ol mýzykalyq ústirttikke búkil bolmysymen qarsy. Ánderdi bir jarym mınýttan artyq tyńdaı almaıtyn myna dáýirde onyń shyǵarmashylyǵy tyńdaýshyny árbir yrǵaqty tereńirek úńilýge shaqyrady. Onyń úlgisi retinde «Ave Maria» ánin aıtýǵa bolady, – deıdi ol.
Mádenı kommýnıkatsııa taqyrybyn belgııalyq VLAN basylymy Dımashtyń shyǵarmashylyǵy men onyń fan-klýbynyń qyzmetine arnalǵan «Qazaqstandyq ánshi Belgııada jankúıerlerin jınap jatyr» atty maqalasynda da kótergen.
Dımash álemniń túkpir-túkpirinen óziniń myńdaǵan jankúıerleriniń basyn qosyp jatyr. Onyń ártúrli elderde 120-dan astam fan-klýby bar. 2022 jyly ol qaqtyǵystar, dinder jáne beıbitshilik taqyryptaryn qozǵaǵan 13 mınýttyq «The Story of One Sky» atty ánine beınebaıan túsirgen bolatyn. Túrli tilge aýdarylǵan «Bir aspan astynda biz beıbitshilikti tańdaımyz» degen uran jasalǵan edi.
Qazaqstandyq ánshi Dımash Qudaıbergenge arnalǵan fan-klýb 2021 jyly Belgııada paıda boldy. Sodan beri onyń músheleri saıahattap, ár túrli is-shara uıymdastyryp, qaıyrymdylyq sharalaryn da ótkizip keledi.
Klýb músheleri onyń Armenııada, Túrkııada, Majarstanda, Qazaqstanda, Germanııada, Ispanııada, Latvııada jáne t.b. elderde kontsertterine qatysyp, atsalysyp keledi.
Jyl saıyn ánshiniń týǵan kúnine oraı Brıýssel, Leven nemese Antverpende kezdesý ótedi. 2023 jyly Qazaqstannyń Belgııadaǵy jáne Lıýksembýrgtegi Elshisiniń jubaıy mýzykalyq aspaptar murajaıyna barý úshin topqa qosylyp, sodan keıin keshki as bergen bolatyn.
Eske sala keteıik, buǵan deıin Dımash Qudaıbergen 8 jáne 10 qazanda Mehıkoda kontserti ótetinin habarlaǵan bolatyn.