Tanymal bloger Karrambaby Astanadaǵy Comic Con-nan alǵan áserin jetkizdi
ASTANA. KAZINFORM – Comic Con Astana 2026 festıvaline kelgen Karrambaby laqap atymen tanymal reseılik bloger Karına Egamedıeva Astana men festıvalden alǵan áserin bólisti.
Karına Egamedıeva Qazaqstanda buǵan deıin de bolǵan. Ol Almatyǵa kelgenimen, elordaǵa joly alǵash ret túsip otyr.
– Osyǵan deıin Qazaqstanda boldym, biraq Astanaǵa alǵash ret kelip turmyn. Ushaqtan túsken sátten-aq Astana maǵan erekshe áser qaldyrdy. Qalanyń keńdigi men tazalyǵy birden kózge túsedi. Óte jaryq ári ádemi qala eken. Aýa raıy da keremet. Jalpy, Astana maǵan qatty unady, – dedi bloger.
Ol Qazaqstandaǵy Comic Con-ǵa da alǵash ret qatysyp otyr. Buǵan deıin bloger Los-Andjelestegi osyndaı festıvalde bolǵan.
– Munda bári keremet. Kospleıshilerdiń obrazdary erekshe, qyzyqty stendter de óte kóp. Maǵan ásirese kospleıshilerdi tamashalaǵan unaıdy. Osynshama shyǵarmashylyq adamynyń bir jerge jınalǵanyn kórýdiń ózi meni shabyttandyrdy. Munda árkim óz ıdeıasyn, ónerin kórsetýge tyrysqan. Jalpy, festıvaldiń atmosferasy kóńilimnen shyqty, – dedi ol.
Karrambaby Astana men Los-Andjelestegi Comic Con-nyń atmosferasy bir-birine uqsamaıtynyn da aıtyp ótti. Onyń sózinshe, Los-Andjeleste mundaı aýqymdy sharalar jıi ótetindikten, jergilikti jurt oǵan úırenip qalǵan. Al Astanada festıvalge degen qyzyǵýshylyq pen kelýshilerdiń erekshe yqylasy anyq seziledi.
– Menińshe, Los-Andjeleste adamdardyń mundaı sharalarǵa ábden kózi toıǵan. Óıtkeni onda osyndaı festıvalder óte kóp ótedi. Tipti tanymal adamdy kezdestirýdiń ózi olar úshin qalypty jaǵdaıǵa aınalǵan. Al munda bárimiz erekshe áser alyp júrmiz. Mysaly, búgin «Taqtar oıynynyń» juldyzy Nıkolaı Koster-Valdaýmen sýretke túskende qolym dirildep ketti. Biz mundaı kezdesýlerge áli úırengen joqpyz, – dedi bloger.
Osylaısha, spkıer Astanadaǵy Comic Con-nyń basty ereksheligin festıvalge kelgen jurttyń qyzyǵýshylyǵy men shynaıy emotsııasynan baıqaǵanyn jetkizdi.
Eske sala keteıik, Comic Con Astana 2026 festıvali 6-9 tamyz aralyǵynda ótip jatyr. Bıyl festıval baǵdarlamasyna álemge tanymal akterlermen kezdesýler, halyqaralyq kospleı baıqaýy, avtorlar alańy, oıyn aımaqtary men túrli taqyryptyq stendter engen.
