Tanymal bloger alımentke nebári 20 myń teńge tólegen

ALMATY. KAZINFORM — Almaty qalasy kámeletke tolmaǵandardyń isteri jónindegi mamandandyrylǵan aýdanaralyq sotyna S. esimdi azamatsha júgingen. Ol balasynyń ákesi tanymal bloger retinde qomaqty qarajat tapqanymen, alımentke nebári 20 myń teńge tóleıtinin habarlaǵan.

Sot buǵan deıin J.-nyń S. esimdi kámeletke tolmaǵan balanyń ákesi ekenin anyqtap, osyǵan baılanysty J.-ǵa tabysynyń jáne (ózge) qarajat kózderiniń ¼ bóligi mólsherinde alıment tóleýdi mindettegen.

Іsti qaraý barysynda balanyń ákesi J. óziniń jalaqysy 70 myń teńge ekenin kórsetetin anyqtama usynǵan. Alaıda J. bank shottarynda aıtarlyqtaı qomaqty qarajat bar ekeni jáne onyń demalys maqsatynda shetelge jıi baratyny anyqtaldy.

QR «Neke (erli-zaıyptylyq) jáne otbasy týraly» Kodeksiniń 141-babyna sáıkes, ata-analardyń kámeletke tolmaǵan balalarǵa alıment tóleý týraly kelisimi bolmaǵan kezde jáne ata-anasynyń tabysyna jáne (nemese) ózge de qarajat kózderine úlestik qatynasta alıment óndirip alý múmkin bolmaǵan jaǵdaılarda, taraptardyń biriniń múddelerin qıyn nemese eleýli túrde buzǵan jaǵdaılarda sot alıment mólsherin aıqyndaýǵa quqyly. Ol aı saıynǵy turaqty aqshalaı somada nemese bir mezgilde úlestermen jáne turaqty aqshalaı somada óndirip alynady.

Mundaı jaǵdaılarǵa tabys kózi jıi ózgerip turatyn jáne (nemese) ózge qarjy kózderi bar ata-analardan ne eger ata-ana tabysyn tolyq nemese ishinara qolma-qol alsa, alımentterdi óndirip alý jatady.

— Іs boıynsha belgilengen mán-jaılardy, onyń ishinde jaýapkerdiń ózge tabysynyń bolýyn eskere otyryp, sot balanyń múddesi úshin jaýapker J.-dan S. paıdasyna 30 AEK mólsherinde turaqty aqshalaı somada alıment óndirip alý týraly sheshim qabyldady, — delingen QR Joǵarǵy Sotynyń habarlamasynda.

Sot sheshimi ázirge zańdy kúshine engen joq.