Tanymal arheolog Zeınolla Samashev Atyraý oblysynyń qurmetti azamaty atandy
ATYRAÝ. KAZINFORM – Elimizge tanymal arheolog Zeınolla Samashevqa Atyraý oblysynyń qurmetti azamaty ataǵy berildi.
Onyń jetekshiligimen 1999 jyly Jylyoı aýdanyndaǵy Araltóbe qorǵanynan elimizdegi ekinshi «Altyn adam» tabylǵan. Qazir arheolog ortaǵyrlyq Saraıshyq qalashyǵynyń tarıhyn, arheologııasyn zertteýge úles qosyp júr.
Atyraý oblystyq máslıhaty bıyl 24 mamyrdaǵy sessııasynda arheologke osyndaı eńbegi úshin Atyraý oblysynyń qurmetti azamaty ataǵyn berýge sheshim qabyldady. Qurmetti ataqty arheologke Atyraý oblysynyń ákimi Serik Shápkenov tapsyrdy.
Zeınolla Samashev arheologııa salasyndaǵy jumysyn Sh.Ýálıhanov atyndaǵy Tarıh, arheologııa jáne etnografııa ınstıtýtynda bastaǵan. Osy ınstıtýttyń alǵashqy arheologııa, odan soń Á.Marǵulan atyndaǵy Arheologııa ınstıtýtynyń ejelgi óner bólimine jetekshilik etken. Qazir Á.Marǵulan atyndaǵy Arheologııa ınstıtýtynyń bas ǵylymı qyzmetkeri bolyp jumys isteıdi.
Arheologtyń negizgi zertteý nysany – Qazaqstan men Orta Azııanyń ejelgi jáne orta ǵasyrlardaǵy arheologııasy, tarıhy, mádenıeti men óneri. Onyń avtorlyǵymen 100-den astam ǵylymı jumysy Qazaqstan, Reseı, QHR, Frantsııa, AQSh-ta jaryq kórgen.
Onyń jetekshiligimen 2017 jyly Shyǵys Qazaqstan oblysynyń Qatonqaraǵaı aýdanyndaǵy Berel qorǵany ashylǵan. Arheologtyń aıtýynsha, qorǵannan áıeldiń bas kıiminiń, tony men belbeýiniń qaldyǵy tabylǵan. Oǵan qosa eki attyń qaldyǵy shyqqan.
«Biz zerttegen qorǵan tonalǵan. Al, aqsúıek áıel bizdiń zamanymyzǵa deıingi ІІІ ǵasyrdyń basy men ІV ǵasyrdyń aıaǵynda ómir súrgen bolýy múmkin», -deıdi Zeınolla Samashev.
Eske sala ketelik, budan buryn Atyraý oblysyndaǵy qorǵandardan eki «Altyn adam» tabylǵanyn jazǵan bolatynbyz.
