Tanymal ánshini Túrkistan oblysynda toıda soqqyǵa jyqty

TÚRKІSTAN. KAZINFORM - Oqıǵa Tólebı aýdanynyń Zaǵambar aýylynda bolǵan.

Áleýmettik jelide taraǵan vıdeodan toıhanada án aıtyp turǵan Azoda esimdi ánshige er adam soqqy jasaǵanyn kórýge bolady. Saldarynan zardap shekken ánshi jerge qulaǵan. Odan keıin oǵan jan-jaǵyndaǵy adamdar kómek kórsetken. Keıinirek Azodanyń ózi habarlaǵandaı, shabýyl jasaǵan adam onyń burynǵy qaıyn atasy bolyp shyqqan. Onyń aıtýynsha, ol oqıǵa kezinde mas kúıde bolǵan.

– Men án aıtyp turǵan kezde ol kelip, bar kúshimen urdy. Bul kópshilik aldynda, kóptegen adamnyń kózinshe boldy. Kináli zań boıynsha jazasyn alsyn dep ótinemin, - dep jazdy ánshi óziniń áleýmettik jelidegi paraqshasynda.

Onyń aıtýynsha, oqıǵa bolǵan kúni er adam narkologııalyq saraptamaǵa jiberilmegen. Túrkistan oblystyq Polıtsııa departamentiniń baspasóz qyzmeti oqıǵanyń bolǵanyn rastady.

– Atalǵan derek boıynsha «Uryp-soǵý» babymen qylmystyq is qozǵaldy. Kúdikti anyqtalyp, polıtsııaǵa jetkizildi. Barlyq mán-jaıdy anyqtaýǵa baǵyttalǵan qajetti sharalar júrgizilip jatyr. Tergeý nátıjesi boıynsha tıisti sheshim qabyldanady. Polıtsııa kez kelgen quqyqqa qaıshy áreket zań aıasynda jaýapkershilikke ákeletinin eske salady, - delingen habarlamada.

Aıta keteıik, budan buryn Túrkistanda medıtsına qyzmetkerine kúsh qoldanǵan turǵyn qamaýǵa alynǵan bolatyn.