Tanymal akter Asqar Jumabek 6,5 jylǵa sottaldy

Almatyda tanymal akter Asqar Jumabekke sot úkimi shyqty, dep habarlaıdy Kazinform. 

№2 Bostandyq aýdanynyń sotynda meımandardy uryp-soqqan karaoke-bardyń qyzmetkerlerine qatysty qylmystyq is qaraldy.

Sottalýshylarǵa buzaqylyq jasady, buzaqylyq pıǵylda bir top adamnyń densaýlyǵyna qasaqana aýyr jáne ortasha zııan keltirdi degen aıyp taǵyldy.

Sotta anyqtalǵandaı, byltyr 28 jeltoqsanda qaladaǵy karaoke-barlardyń birinde qonaqtar men mekeme qyzmetkerleri arasynda janjal shyǵyp, onyń sońy tóbeleske ulasqan.

Osy mekemeniń kúzetshileri men dı-djeıi, sondaı-aq barda bolǵan olardyń tanystary jábirlenýshilerdi ura bastaǵan, olar qashýǵa májbúr bolǵan.

Alaıda sottalýshylar olardy kóshede qýyp jetip, tóbelesti jalǵastyrǵan.

«Saldarynan bes jábirlenýshiniń ekeýine aýyr jáne ortasha deńgeıde densaýlyǵyna zııan kelgen. Tóbeles kezinde sottalýshynyń biri pyshaq qoldanýǵa tyrysqan», — dep habarlady sottan.

Sottalýshy Asqar Jumabektiń buryn da adam uryp-soqqany úshin qylmystyq jaýapkershilikke tartylǵany belgili boldy.

«Sottalýshylardyń kinási kýágerler men jábirlenýshilerdiń aıǵaqtary, sot saraptamasy qorytyndysy, beınebaqylaý kamerasyna túsip qalǵan beınejazbalar arqyly rastaldy», — dep atap ótti sottyń baspasóz qyzmeti.

Sottalýshylar óz kinásin moıyndaǵan joq. Jábirlenýshiler de keshirim bermedi.

Prokýror olardy 6 jyl merzimge bas bostandyǵynan aıyrýdy surady.

Sot úkimimen J., Q., T., S., R., N. jáne K. Qylmystyq kodekstiń 293, 106 jáne 107 baptary boıynsha kináli dep tanyldy.

Bárine 6 jáne 6,5 jylǵa bas bostandyǵynan aıyrý jazasy taǵaıyndaldy.

Asqar Jumabekti bas bostandyǵynan aıyrý túrindegi jaza 6 jyl 6 aı 15 kún merzimge taǵaıyndaldy, óıtkeni ol buǵan deıin QR QK 107 baby (adamdy uryp-soǵý) boıynsha kináli dep tanylǵan.

Sonymen qatar, sottyń aldyńǵy úkimi boıynsha ótelmegen merzimine baılanysty oǵan 15 kún qosyldy.

Sot úkimi zańdy kúshine engen joq.

Akterdiń ózi kinásiz ekenin aıtyp, Prezıdentke vıdeoúndeý jasady.

«Qazaqstan Respýblıkasynyń azamaty retinde, qurmetti Prezıdent, sizden ótinip, kómek suraǵym kelip tur. Myna vıdeony túsirýge májbúr bolyp turmyn. Sebebi basymda bir is bolyp jatyr. Qurmetti sot, ózim halyqtyń aldynda júrgen adammyn, óner adamymyn, aktermin. Sol sebepti osy vıdeo sizge jetedi degen úmittemin», - dedi ol.

Aıta keteıik, Asqar Jumabek «Qarlyǵash uıa salǵanda», «Raýza», «Aqjaýyn» telehıkaıalary arqyly kórermenge jaqsy tanys.