Tańǵy jetiden saılaý ýchaskelerinde kezek boldy – ShYU baıqaýshylary
ASTANA. KAZINFORM – Shanhaı yntymaqtastyq uıymynyń (ShYU) halyqaralyq baıqaýshylary saılaý ýchaskelerinde tańerteńnen kezek bolǵanyn jáne qazaqstandyqtardyń daýys berýge belsendi qatysyp jatqanyn atap ótti.
Qyrǵyz Respýblıkasynyń Saılaý jáne referendým ótkizý jónindegi ortalyq komıssııasynyń múshesi Almaz Aıbalaevtyń aıtýynsha, tańǵy saǵat jetide-aq saılaý ýchaskelerine daýys berýge kelgen azamattar kezekke turǵan.
– Saılaý ýchaskelerinde daýys berýge kelgen adamdardyń kezegin kórdik. Tańǵy saǵat jeti bolatyn. Daýys berý bastalǵan boıda azamattar daýys berýge daıyn turdy, – dedi ol Astanadaǵy Halyqaralyq baıqaýshylar men sheteldik BAQ ókilderine qolǵabys kórsetý ortalyǵynda ótken brıfıngte.
Halyqaralyq baıqaýshy saılaý ýchaskeleriniń jaqsy daıyndalǵanyn jáne daýys berý úderisiniń tıimdi uıymdastyrylǵanyn atap ótti.
– Qazirgi ýaqytqa deıin eshqandaı zań buzýshylyqty baıqamadyq. Baqylaýdy jalǵastyramyz. Búgin saılaý ýchaskeleri jabylǵan kezde de sonda bolamyz. Daýys berý barysyn baqylap, erteń, delegatsııa basshysy atap ótkendeı, munyń bárin mindetti túrde esebimizde kórsetemiz, – dedi Almaz Aıbalaev.
Reseı Federatsııasy Federaldyq Jınalysy Federatsııa Keńesiniń senatory Oleg Golov ta azamattardyń daýys berýge belsendi qatysyp jatqanyn aıtty.
– Tańǵy saǵat jetide barlyq saılaý ýchaskesi ýaqytyly ashyldy. Azamattar saılaýǵa erekshe yqylaspen kelip jatyr. Saılaý ýchaskelerindegi baıqaýshylarmen de sóılestik, olar tarapynan eshqandaı eskertý bolǵan joq. Sondyqtan qazirgi ýaqytta bári zańnama talaptaryna saı, eshqandaı zań buzýshylyqsyz ótip jatyr dep oılaımyn, – dedi Oleg Golov.
Aıta keteıik, búgin elimizdiń barlyq óńirinde Quryltaı depýtattaryn saılaý bastaldy. Daýys berý 10 423 saılaý ýchaskesinde ótedi.
Sońǵy málimet boıynsha, Quryltaı saılaýynda saılaýshylardyń 53,12 paıyzy daýys berdi.
Quryltaı saılaýyna qatysty barlyq jańalyqpen myna siltemege ótip oqı alasyzdar.
