«Tańǵy tazalyq qozǵalysy»: Jambyl oblysynda jańa bastama bastaý aldy
ASTANA. KAZINFORM – Jambyl oblystyq Óńirlik kommýnıkatsııalar qyzmeti «Tańǵy tazalyq qozǵalysy» atty erekshe ári tyń bastamany qolǵa aldy . Bul joba paıdaly jáne utymdy dúnıeni ushtastyra otyryp, ár tańdy sergektikpen ári jaýapkershilikpen bastaý ıdeıasynan týyndaǵan.
Joba «Ár tań — múmkindik! Ár tań — tazalyq!» atty uranmen ótip jatyr.
Bes kúnnen beri jalǵasyp kele jatqan bul qozǵalys kún saıyn keńeıip keledi. Alǵashynda tek qyzmetkerler qatysqanymen, qazir aýlalardy tazartý barysynda turǵyndar da qyzyǵýshylyq tanytyp, erikti túrde qosyla bastaǵan. Bul qoǵamda ekologııalyq jáne azamattyq jaýapkershilikke degen qyzyǵýshylyqtyń artyp kele jatqanyn kórsetedi.
Jobanyń basty maqsaty — tańǵy dene jattyǵýynan keıin qorshaǵan ortany tazalaý mádenıetin qalyptastyrý arqyly qoǵamǵa úlgi kórsetý. Sonymen qatar bul bastama respýblıkalyq «Taza Qazaqstan» aktsııasymen úndesip, barsha turǵyndy belsendilikke shaqyrady.
«Tańǵy jattyǵý — óz densaýlyǵymyz úshin jaqsy ádet. Al odan keıingi tazalyq — qoǵam úshin úlken jaýapkershilik»
Bastama saıabaqty ujymdyq tazalaýdan bastaldy. Al keıingi kúnderi qyzmetkerler óz aýlalaryn nemese kóshelerin tazalap, bul sátterdi beınejazbaǵa túsirip, kún saıyn ortaq chatqa nemese áleýmettik jelige júkteıdi. Eń bastysy — árbir tańǵy tazalyq birikken beınerolıkke aınalyp, shabyt beretin kontent retinde jarııalanyp otyrady.
Qozǵalys barysynda aýlalarda júrgen qyzmetkerlerdiń áreketin kórgen turǵyndar da qosyla bastady. Bul — tazalyqtyń juqpaly ekenin, jaqsylyqtyń úlgi arqyly taralatynyn taǵy bir márte dáleldeıdi.
Bul jobanyń nátıjesinde azamattar jeke mádenıetin jetildirip, qoǵamdyq sana-sezimi men jaýapkershiligi artady. Jambyl oblysy osy bastama arqyly «Taza Qazaqstan» aktsııasyna naqty úles qosyp otyr.
Bul qozǵalys — jaı tazalyq emes. Bul — sana, mádenıet pen jaýapkershilikke bastar jol. Sondyqtan Jambyl oblystyq Óńirlik kommýnıkatsııalar qyzmeti bul estafetany oblys turǵyndaryna jáne elimizdegi barlyq Óńirlik kommýnıkatsııalar qyzmetterine joldaıdy.
Tańdy jaqsy ispen bastaıyq! Ár tań — jańa múmkindik!