Tańǵy astaǵy jándik: Epıdemıolog mamandar tekserý qorytyndysyn shyǵardy
AQTÓBE. KAZINFORM — Aqtóbe oblysy Muǵaljar aýdany Qandyaǵash qalasyndaǵy balabaqshada 19 keliden asatyn suly úrpegi joıyldy. Sonymen birge zańdy tulǵaǵa aıyppul salyndy.
Qandyaǵash qalasyndaǵy «Samal» bóbekjaı-baqshasynda tańǵy as ishinen jándik tabylyp, Muǵaljar aýdandyq sanıtarııalyq-epıdemıologııalyq baqylaý basqarmasy jospardan tys tekseris júrgizildi. Tekserý kezinde tamaq ónimderin saqtaý tártibi buzylǵany anyqtaldy. Naqtylasaq ylǵaldylyqty baqylaıtyn aspaptar joq, tońazytqyshqa termometr qoıylmaǵan. ıAǵnı, tamaq ónimderin saqtaý rejımin avtomatty baqylaý jáne tirkeý júıeleri qarastyrylmaǵan.
— Vızýaldy tekserý kezinde jarma saqtalatyn qoımadan jándikter tabyldy. Sondaı-aq suly botqasynyń táýliktik synamasynda jándik (qońyzdar) anyqtaldy. ıAǵnı, taǵam daıyndaý tehnologııasynyń saqtalmaıtyndyǵyn kórsetedi. Sonymen qatar, jospardan tys tekserý suly jarmasynyń (shıki ónim) synamasy alynyp, «Ulttyq saraptama ortalyǵynyń» Aqtóbe oblystyq fılıalyna jetkizildi. Tamaq ónimderiniń synamalaryn zertteý hattamasyna súıensek suly jarmasynyń úrpekterinen tiri zııankester (jándikter) tabyldy. Qaýipti tamaq ónimderin joıý jónindegi komıssııa qurylyp, 19,350 kg mólsherde «Gerkýles» suly úrpekteri joıyldy. Basqarma mamandarymen zańdy tulǵaǵa hattama toltyrylyp, 452 180 teńge kóleminde aıyppul salyndy jáne anyqtalǵan buzýshylyqtardy joıý týraly uıǵarym berildi. Uıǵarymnyń oryndalýy basqarmanyń baqylaýynda tur, — dep habarlady Aqtóbe oblystyq sanıtarııalyq-epıdemıologııalyq baqylaý departamentiniń baspasóz qyzmeti.
Al Aqtóbe oblystyq bilim basqarmasy birneshe adamnyń jumystan shyǵyp, keıbiri sógis alǵanyn habarlady.
— Qandyaǵash qalasyndaǵy «Samal» bóbekjaı-baqshasynyń qyzmetine qatysty zerdeleý júrgizildi. Atalǵan balabaqshada balalardyń ýlaný faktisi tirkelmedi. Degenmen óz qyzmetine salǵyrt qaraǵany úshin jaýapty tulǵalarǵa tıisti sharalar qoldanyldy. «Samal» bóbekjaı-baqshasynyń meńgerýshisi A.Týretova jumystan bosatyldy. Sonymen qatar atalǵan mekemeniń bas aspazy men medbıke jumystan bosatyldy. Qoımashyǵa qatań sógis berildi (keıin óz erkimen jumystan shyqty) jáne 2 aspazǵa sógis berildi, — dep habarlady oblystyq bilim basqarmasynyń baspasóz qyzmeti.
Eske salsaq, bıyl 13 qańtar kúni Muǵaljar aýdanyndaǵy Samal bóbekjaı-baqshasyndaǵy balalardyń tańǵy asynan qońyz tabyldy.