Tańdaý jasaýǵa, bas tartýǵa bizdiń esh qaqymyz joq – qutqarýshymen suhbat

- Nurbolat, bul salaǵa qalaı keldińiz?

- 2015 jyly Tótenshe jaǵdaılar departamenti janynan jedel-qutqarý otrıady quryldy. Qutqarýshy – mártebeli mamandyq, ózime unaıdy, jigerli minez ben kúsh-qaıratty qajet etetin naǵyz er adamdardyń jumysy dep esepteımin, sondyqtan birden osynda aýysyp, qurylǵan kúnnen bastap eńbek etip kelemin. Ár kúnimiz qaýip-qater men táýekelge toly, al bul adamdy únemi jınaqy júrýge, kez-kelgen nársege daıyn bolýǵa tárbıeleıdi. Ári qoǵamǵa paıdaly jumys, men úshin mártebeli mamandyq.

- Dese de, jumysyńyzda tynysh ótetin kezekshilikter bola ma?

- Iıa, bolady, biraq, óte sırek. Ondaıda shaqyrtý joq dep otyrmaımyz. Ózimizdiń belgilengen kún tártibimiz bar. Sol boıynsha dárister ótedi, fızıkalyq jattyǵýlar jasaımyz. Biz aýysymnan shyqqannan keıin demalýymyz kerek, desek te arqany keńge sala almaımyz, únemi shaqyrtýǵa daıyndyqpen júrýge tıispiz. Kez-kelgen ýaqytta kútpegen jaǵdaı bolyp, bizdi shaqyryp qalýy múmkin. Máselen, ótkende bir adam joǵaldy, táýliktik jumystan shyqqan bizdi dabylmen kóterip, jınalýǵa bir saǵat ýaqyt berdi. Súıtip, qaıta jumysqa da kirisip kettik.

- Turǵyndardan kóbine qandaı shaqyrtýlar túsedi?

Qala boıynsha eń kóbi abaısyzda jabylyp, qulypqa túsken esikterdi ashýǵa, buzýǵa shaqyrtady. Ártúrli jaǵdaı bolyp jatady, mysaly ata-anasy syrtqa shyqqanda abaısyzda esik jabylyp qalyp, úıde 3-4 jasar sábı úıde jalǵyz qalyp qoıatyn kezder bar. Mundaıda bala ózdiginen ishinen esikti asha almaıdy, ondaıda esikti buzýǵa týra keledi. Nemese shatyrmen tómen túsip, páterge balkon ne tereze arqyly kiremiz, bolmasa kórshilermen kelisip, solardyń páteri arqyly ótemiz. Keıde jalǵyzilikti qarııa kóp ýaqyt boıy úıinen shyqpaı, esikterin ashpasa, kórshileri alańdap bizdi shaqyrady. Polıtsııamen áriptestik ornatqanbyz, olar da esikti ashýǵa kómek surap jatady. Keıde qart adamdar aýyryp tura almaı, oǵan da shaqyryp, tasymaldaýǵa kómektesemiz. Jol-kólik oqıǵalaryna baramyz. Keıde biz jetkenge deıin apatqa túskender qaıtys bolyp ketedi. Men ózim osyndaı shaqyrtýǵa birneshe ret shyqtym, Beskól mańyndaǵy apatta kólikke qystyrylyp qalǵan adamdy aman-esen alyp shyqtyq.

- Shaqyrtýlarda qyzyqty jaǵdaılar bolyp tura ma?

- Qyzyqty jaǵdaı emes, orynsyz shaqyrtýlar bolady. Máselen aǵashqa minip ketken nemese páterdiń shahtasynda qystyrylyp qalǵan úı janýarlaryn qutqarýdy surap shaqyrtatyndar bar. Biz kóńilge qonymsyz bolsa da baramyz, óıtkeni tańdaý jasaýǵa, bas tartýǵa quqymyz joq. Árıne, jan-janýarlardy, jalpy tirshilik ıelerin qutqarýdan qashqaqtaǵanymyz emes. Tek, onyń ekinshi jaǵy bar: biz máselen mysyq bolsyn, ıt bolsyn sondaı bir shuńqyrdan shyǵaryp, ony ıesine tabystap júrgende, qalanyń bir shetinde shuǵyl túrde adamdardy qutqarýǵa kómek kerek bolyp jatady. Ondaı sátte árbir sekýndtyń ózi sanaýly. Tarazynyń bir tabaǵynda - adam ómiri tur. Mine, sony keıbireýlerdiń túsinbeıtini taǵy bar. Biraq, taǵy qaıtalap aıtaıyn, biz eshqandaı shaqyrtýdan bas tartýǵa qaqyly emespiz. Qandaı shaqyrtý tússe de biz belgili tártip boıynsha 2 mınýttan kóp aspaıtyn ýaqytta áreket etýimiz kerek.

- Qandaı úlken apattarda jumys istedińiz?

- 2016 jyly oblysta úlken sý tasqyny boldy. Sol jyly sýda qalǵan aýyl turǵyndaryna kómektesý úshin Ýálıhanov aýdany, Qýlykól aýylyna attandyq. Keıin Tımırıazev aýdanynyń Stepnoı eldi mekeninde jáne Taıynsha aýdanynda jumys istedik. Bıyl 2-jylý-elektr ortalyǵynda tútin murjasy qulaǵanda da biz úıindiniń astynan kásiporyn jumysshysyn izdedik. Ókinishke qaraı bir áıel mert boldy.

- Tikeleı ózińiz adam ómirine arasha túsken kezińiz boldy ma?

- Petropavldaǵy Ýálıhanov kóshesinde ornalasqan jataqhanada órt shyqty. Bul ótken jyldyń qarasha aıynda boldy. Mundaı oqıǵada bizdi de shaqyrady, órt sóndirýge tikeleı qatyspasaq ta. Ol jerde adamdardy qaýipsiz jerge shyǵarýmen, ózdiginen júre almaıtyndardy tasymaldaýmen aınalysamyz. Órt sóndirýshiler ýly gazǵa ýlanǵan er adamdy es-tússiz bólmeden alyp shyqty. Men bir qaraǵanda ol adamnyń júregi toqtap qalǵanyn túsindim. Alaıda, oǵan alǵashqy medıtsınalyq kómek kórsetip, qoldan tynys aldyrdym. Tek úshinshi áreketten keıin ǵana ol ózdiginen demala bastady. Jalpy osyndaı jaǵdaılar jıi bolyp turady. Men bólimshe basshysy – qutqarýshymyn. Bólimshedegi jigittermen birge birneshe adamnyń ómirine arasha tústik.

- Bólimshede neshe adam bar? Ujymdaǵy ahýal qandaı?

- Bólimshede 7 adam bar. Ujym bizde tatý, basqasha bolýy da múmkin emes. Óıtkeni kez-kelgen qutqarý operatsııasynda biz bir-birimizge senim bildirip, arqa súıeýimiz kerek. Keı shaqyrtýlarda ómirimizdi qaýip-qaterge tigýge týra keledi. Osyndaıda qasyńdaǵy áriptesiń saǵan qoldaý kórsetpese, báriniń sońy jaqsy bolmaýy múmkin.

- Otbasyńyz jumysyńyzǵa qalaı qaraıdy?

- Otbasym meniń jumysyma úırendi. Meniń tańdaýyma qurmetpen qaraıdy. Balalarym, maqtan etip, úlgi tutady.

- Qutqarý operatsııasy kezinde qoryqqan kezderińiz boldy ma?

- Qorqý – adamǵa tán. Tek aqyly kem adamdar ǵana qoryqpaıdy dep oılaımyn. Qorqynysh – adamnyń qorǵanysh sezimi. Kez-kelgen shaqyrtýda tapsyrmany 100 % oryndaýdan basqa, qasyńdaǵy ıyq tirestirip júrgen áriptesterge qatysty úlken jaýapkershilik bar. Jumys barysynda órtte, jol apattarynda qaza tapqan, sýǵa ketken adamdardyń múrdelerin jıi kóremiz. Oǵan da ýaqyt óte kele et úırenip alady.

- Qutqarýshylardyń óz arasynda bir yrymdar bar ma?

- Joq, bizdiń qyzmettiń qurylǵanyna nebary 7 jyl ǵana, ázirge qandaı da bir erekshelenetin ózindik dástúrlerimiz qalyptasyp úlgergen joq dep oılaımyn.

- 19 qazan – qutqarýshylar kúni. Mereke qarsańynda áriptesterińizge qandaı tilegińiz bar?

- Áriptesterime myqty densaýlyq, tynysh uıqy, otbasylaryna baq-bereke, jalpy elimizde tótenshe jaǵdaılardyń az bolýyn tileımin,

- Rahmet!