Tańdaǵan mamandyǵyńdy súımeı, jaqsy nátıjege qol jetkizý qıyn — Qazaqstannyń Eńbek Eri

Áýlettiń negizin qalaǵan Qýat Qarajumanov — soǵys ardageri, elge oralǵan soń shırek ǵasyrǵa jýyq aýyldy basqardy, aýyl sharýashylyǵy salasynda jumys istedi. Keıin úsh uly da áke ónegesin jalǵap, traktor-kombaındy tizgindedi. Búginde sol eńbek dástúrin nemere-shóbereleri jalǵastyryp keledi.

Bekseıit aýylynda turatyn Murat Qarajumanovtyń mehanızator bolyp eńbek etip júrgenine 45 jyl bolǵan. 30 jyl kombaındy júrgizse, sońǵy 15 jyldan beri K-700 traktorynyń tizgininde.

Qysy-jazy tynym tappaıtyn Murat aǵa búgin de kúzgi qarbalastyń bel ortasynda júr.

— Jańbyrly kúnderi alqapqa egin oraǵyna shyǵa almaımyz. Mundaıda mal azyǵyna qajet súrlemdi daıyndaımyz. Jer kepkesin traktorymmen astyq tasýǵa shyǵamyn. Qysta da jumyssyz otyrmaımyn. Qar basqan joldardy ashý kerek, kóktemde jer jyrtyp, egin egemiz, — deıdi mehanızator.

Murat aǵanyń uly Maqsat ta ata jolyn tańdaǵan. Sharýashylyqta 14 jyldan astam eńbek etse, sonyń sońǵy tórt jylynda — mal azyǵyn daıyndaý tsehinde qondyrǵy operatory. Bala kezinen ákesiniń qasynda júrip, tehnıkanyń tilin úırengen Maqsat búginde óz isiniń mamanyna aınalǵan.

— Men bul jerde dándi daqyldardy úgip, jemdi malǵa daıyndap beremiz. Biz daqyldyń birneshe túrin: kúnbaǵys, raps, júgeri, bıdaı, taǵy basqalaryn ósiremiz. Sonyń bárin aralastyryp, dárýmender men arnaıy qospalardy qosyp, daıyn ónim etip malǵa beremiz. Kishkentaıymnan ákemniń qasynda júrip óstim. 15 jasymda alǵash ret MTZ traktoryn júrgizdim. Qazir arnaıy tehnıkalardyń barlyǵyn derlik basqara alamyn, — deıdi Maqsat Qarajumanov.

Murat aǵanyń túzde alańsyz eńbek etýiniń bir syry — shańyraqtyń shyraıyn kirgizip, otbasynyń uıytqysyna aınalǵan jary Qymbattyń qoldaýy. Erli-zaıypty eki ul, bir qyz tárbıelep ósirip, búginde solardan taraǵan nemere-jıenniń qyzyǵyn kórip otyrǵan baqytty ata-áje.

— Aýylda turǵasyn mal ustaımyz, jaz boıy sıyr saýyp, maı-qaımaq alamyn, qurt qaınatyp, aıran uıytamyn. Úıge endi men qaraımyn ǵoı bári jumysqa ketkende, jazda nemerelerim kelip, kómektesedi. Tatý-tátti, berekeli otbasy bolý úshin mynaý erdiń, mynaý áıeldiń jumysy dep sanaspaý kerek. Qaısymyzdyń qolymyz bos, isteı salamyz. Balalardy da eńbekqor etip tárbıeledik, — deıdi Qymbat Qarajumanova.

Qarajumanovtar shańyraǵynda ulttyq qundylyqtarǵa degen qurmet te erekshe. Áýlettiń úlkenderi eńbegimen tanylsa, keıingi býyn ónerimen órisin keńeıtip keledi. Murat pen Qymbattyń ekinshi uly Qaıyrgeldi óner jolyn tańdady. Qazir ol Mamlıýtka qalasyndaǵy óner mektebinde dombyra aspabynan dáris beredi. Nemereleri Ernur Murat Petropavldaǵy Ermek Serkebaev atyndaǵy óner mektebiniń dombyra synybynda bilim alyp júr. Bıyl 8-synypqa kóshken jas dombyrashy talaı dodada top jardy.

— Dombyrany alǵash ret 6 jyl buryn qolǵa alǵan edim. Kóptegen saıystarǵa qatysyp júldeli oryndar aldym. Bıyl Dombyra kúninde oblys ákimi maǵan jańa dombyrany tartý etti, — deıdi Ernur Murat.

Erli-zaıypty balalaryna aqyl aıtýmen ǵana shektelmeı, óz ómirimen úlgi kórsetti. Eńbekke adaldyqty, úlkenge qurmetti, otbasyǵa degen jaýapkershilikti olar balalaryna kúndelikti isimen sińirdi.

— Bireýdiń ala jibin attama, jumysqa barsań adal jumys iste dep aıtyp otyramyz. Bizge ákemiz de solaı úıretken. Qandaı mamandyq bolsa da, mamandyqty súıe bilý kerek. Sonda ǵana jaqsy jetistikterge qol jetkizesiń. 2000 jyly sharýashylyqta birinshi oryn alyp, basshylyq avtokólik mingizdi. 2017 jyly Eńbek dańqy ordenimen marapattaldym. Eńbektiń baǵalanǵany ǵoı bul, byltyr Eńbek Eri ataǵyna ıe boldym, — deıdi Murat Qarajumanov.

Bıyl Qarajumanovtar otbasy «Mereıli otbasy» ulttyq baıqaýynyń oblystyq kezeńinde jeńiske jetti.

Osyǵan deıin Memleket basshysy eńbekqorlyq halqymyzdyń bolmysyna sińgen qasıet bolýǵa tıis ekenin aıtqan edi.