Tańbalaý júıesi dárihanalardaǵy 26 myńnan astam zańsyz qaptamany anyqtady
ASTANA. KAZINFORM — Qazaqstanda taýarlardy mindetti tsıfrlyq tańbalaý júıesi keńeıtilip jatyr. Bul týraly Saýda jáne ıntegratsııa vıtse-mınıstri Áset Núsipov Ortalyq kommýnıkatsııalar qyzmeti alańynda ótken brıfıngte málim etti.
Vıtse-mınıstrdiń aıtýynsha, 2024 jylǵy 1 shildeden bastalǵan tsıfrlyq baqylaý nátıje berip otyr.
— Júıe arqyly dárihanalarda zańsyz satylǵan 26 myńnan astam tegin dárilik qaptama anyqtaldy. 31 uıymǵa 12 mln 300 myń teńge aıyppul salyndy. 43 dárihanaǵa zań buzýdy joıý týraly nusqama berildi, — dedi spıker.
Sonymen qatar ol mindetti tańbalaý tizimi 2027-2029 jyldar aralyǵynda keńeıtiletinin habarlady.
— Tańbalaýdy 8 taýar tobymen keńeıtý kestesi bekitildi. Oǵan turmystyq hımııa men kosmetıka, ósimdik maıy, kondıterlik ónimder, olardyń jekelegen túrleri kiredi. 2028 jyly balalar oıynshyqtary, tez erıtin sýsyndar, antıseptıkter, azyq-túlik taýarlary, al 2029 jyly konservilengen ónimder qosylady. Budan bólek, bıylǵy qyrkúıekte munaı ónimderin molekýlalyq tańbalaý boıynsha pılottyq joba bastaldy. Bul tehnologııa otynǵa arnaıy marker qosý arqyly onyń sapasy men shyǵý tegin mobıldi analızatorlarmen tekserýge múmkindik beredi, — dedi Áset Núsipov.
Vıtse-mınıstrdiń sózinshe, búginde tańbalaý óndirýshi men satýshyǵa qoıylatyn tehnıkalyq talap qana emes. Ol zańsyz saýdaǵa tosqaýyl qoıyp, adal bıznes ókilderine teń múmkindik beretin negizgi qural.
— Jańa tizimge halyq jıi tutynatyn kúndelikti taýarlar endi. Azyq-túlik, turmystyq hımııa, kosmetıka, balalar oıynshyqtary — bular ár otandasymyz kúndelikti satyp alatyn ónimder. Qazirdiń ózinde tutynýshylar «Naqty ónim» mobıldi qosymshasy arqyly taýar kodynan tolyq aqparat alady. Júıe keńeıgen saıyn bul múmkindik kúndelikti satyp alynatyn taýarlardyń basym bóligin qamtıdy. Osylaısha, tańbalaý aıasyn keńeıtý azamattarǵa taýardyń zańdylyǵyn tekserýge, sapaly tańdaý jasaýǵa jáne kúmán týdyrǵan ónimder týraly habarlaýǵa jol ashady. Bul tutynýshylarǵa óz quqyǵyn qorǵap, zańsyz aınalymǵa birge bóget qoıýǵa múmkindik beredi, — dedi vıtse-mınıstr.
Aıta keteıik, 7 jylda tegin dári-dármekpen qamtamasyz etýge 1,3 trln teńge bólindi.
