Tańbalary tozyp, qorshaýlary qısaıǵan: Túrkistandaǵy joldardan kemshilikter anyqtaldy
TÚRKІSTAN. KAZINFORM — Túrkistan oblysy arqyly ótetin respýblıkalyq mańyzy bar kúre joldardyń tehnıkalyq jaı-kúıi syn kótermeıdi.
Jol boıyndaǵy tańbalar óship, belgiler men qorshaýlardyń tozyǵy jetken. Sýaǵar arnalary da ýaqytyly tazalanbaıdy. Bul óz kezeginde jol qozǵalysy qaýipsizdigine edáýir qaýip tóndiretini belgili. Qoǵam tarapynan jıi synǵa ushyraıtyn bul másele mamandar nazarynan tys qalmady.
«Jol aktıvteri sapasy ulttyq ortalyǵy» RMK Túrkistan oblystyq fılıaly mamandary respýblıkalyq mańyzy bar avtomobıl joldarynyń jaı-kúıin tekserip shyqty. Arnaıy uıymdastyrylǵan reıd barysynda oblys aýmaǵyndaǵy jalpy uzyndyǵy 500 shaqyrymnan asatyn 12 nysan zertteldi. Tekserý nátıjesinde 179 tehnıkalyq aqaý anyqtaldy.
Ortalyqtyń Túrkistan oblystyq fılıaly bólim basshysy Qaırat Shákirovtiń aıtýynsha, bul kemshilikter negizinen jol jabyndysynyń tozýy, jol belgileriniń zaqymdanýy, sýaǵar júıeleriniń lastanýy, jol tańbalarynyń óshýi sııaqty máselelerden turady.
Anyqtalǵan aqaýlardyń basym bóligi «Batys Eýropa — Batys Qytaı» halyqaralyq kólik dáliziniń Túrkistan oblysyndaǵy ýchaskesinde, Shymkent qalasynan Ózbekstan shekarasyna deıingi jolda, Jızaq — Gagarın — Jetisaı — Kırov — Qyzylásker — Saryaǵash — Abaı — Jibek joly baǵytyndaǵy 221 shaqyrymdyq bóliginde tirkelgen.
— Tekserý nátıjesi boıynsha joldardy kútip-ustaýǵa jaýapty «KAJ-Servıs» JShS-ine naqty tapsyrmalar berildi. Qazirgi tańda merdiger mekeme 52 aqaýdy joıǵany belgili boldy. Qalǵan bólikter boıynsha da jumystar júrgizilip jatyr, — deıdi Qaırat Shákirov.
Aıta keteıik, budan buryn Túrkistan — Qyzylorda jolyndaǵy qurylystan aqaýlar anyqtalǵanyn jazǵan bolatynbyz.