Tańat Jaılybekovtyń 80 jyldyǵyna arnalǵan eske alý keshi ótedi
ALMATY. Jeltoqsannyń 4-i. QazAqparat /Názıra Eleýhan/ - M.Áýezov atyndaǵy akademııalyq drama teatrynda jeltoqsan aıynyń 5-i kúni Qazaqstannyń eńbek sińirgen ártisi, teatr jáne kıno akteri Tańat Jaılybekovtyń 80 jyldyǵyna arnalǵan eske alý keshi ótedi,
dep habarlaıdy QazAqparat.
«Tańat Jaılybekov qaıtalanbas darynyn tanytyp ketken sýretker. Onyń ulttyq ónerdi damytýdaǵy eńbegi - halqymyzdyń kórkemdik murasy. Ol esh ýaqytta umytylmaq emes», deıdi teatrtanýshy, ǵalym Baǵybek Qundaqbaev.
Kórnekti teatr jáne kıno akteri Tańat Jaılybekov - ulttyq óner sańlaqtarynyń biri, sahna men ekranda nebir kúrdeli beıneler jasaǵan, ulttyq mádenıetke kóp eńbek sińirgen óner ıesi. Ol 1929 jyly Almaty oblysy, Jambyl aýdany, Birlik aýylynda dúnıege kelgen. Almaty qalasynyń №18-shi orta mektep-ınternatynda oqyp, 8 synypty óte jaqsy degen baǵamen bitirgen onyń taǵdyry teatrmen tyǵyz baılanysqan. Teatrǵa kelýine kórnekti akter, rejısser, ustazy Sháken Aımanov sebepker bolady. Eńbek jolyn 1944 jyly 15 jasynda Qazaqtyń M.Áýezov atyndaǵy akademııalyq drama teatrynda bastaıdy. Teatrda eńbek ete júrip, 1946 jyly Kórkemóner ýchılışesiniń 3-shi kýrsyna oqýǵa túsedi. Al 1949 jyly KSRO halyq ártisi N.S.Plotnıkovtyń kózine túsip, onyń bolashaǵynan úmit kútken sheber ony Máskeýdegi Lýnacharskıı atyndaǵy Memlekettik Teatr ınstıtýtynyń akterlik fakýltetine túsýine kómektesedi. 1954 jyly oqýyn bitirip, áriptesteri Y. Noǵaıbaev, R. Qanybaeva, M.Baızaqovalarmen birge M.Áýezov teatryna qaıta oralady. Sol kezden bastap dúnıeden ótken 1989 jylǵa deıin úzilissiz osy sahnada eńbek etken bolatyn.
Akterdiń teatr men kıno ónerindegi eńbegi az emes. Ol respýblıkalyq radıo men teledıdarda kóptegen habarlar júrgizgen.
Tańat Jaılybekov 1958 jyly Máskeýde «Qurmet belgisimen» marapattalsa, 1966 jyly Qazaq KSR eńbek sińirgen ártisi qurmetti ataǵyna ıe bolǵan.
