Tańat Nóserbaev jańa qyzmettiń tizginin ustady

ASTANA. KAZINFORM – Tańat Nóserbaev – «Ordabasy» klýbynyń sport dırektory laýazymyna taǵaıyndaldy. Bul týraly shymkenttik klýbtyń baspasóz qyzmeti habarlady. 

Buǵan deıin bul qyzmetti atqarǵan Qaırat Áshirbekov klýb júıesinde qala beredi. 

Tańat Nóserbaev –Ońtústik fýtbol mektebiniń túlegi. Fýtbolshy kásibı mansabyn atalǵan klýbtyń farm-komandasynan bastaǵan. Keıin 2011 jyldan bastap el birinshiligindegi «Lokomatıv» komandasynda dop tepti. Artynsha klýbtyń ataýy «Astanaǵa» aýysty. Nóserbaev 2013 jyly elordalyqtardyń kapıtany boldy. Elordalyq komanda sapynda úsh dúrkin el chempıony atanyp, bir ret Qazaqstan Kýbogyn ıelengen. 

2017-2018 jyldary qaıtadan «Ordabasy» komandasynda dop tepti. 2018 jyly «Tobyl» komandasyna jalǵa berildi. Bir jyldan soń «Oqjetpes» jeıdesinde óner kórsetti. 

2008 jyly 11 qazan kúni «Ýemblıde» Anglııaǵa qarsy tuńǵysh ret Qazaqstan quramasy sapynda alańǵa shyqty. 2009 jyly 10 maýsym kúni syrt alańda Ýkraına qaqpasyna birinshi golyn soqty. Bul eki oıyn da 2010 jylǵy álem chempıonatyna irikteý týrnıri aıasyndaǵy kezdesý bolatyn.

2014 jyly 12 tamyz kúni Almatyda Tájikstanǵa qarsy joldastyq kezdesýde kapıtan retinde alańǵa shyqty. Al 2017 jyly 10 maýsym kúni Almatydaǵy Danııaǵa qarsy 2018 jylǵy álem chempıonatyna irikteý aıasyndaǵy oıynda sońǵy ret qurama sapynda alańǵa shyqty.

Eske sala keteıik, buǵan deıin Nurken Mazbaev «Ulytaý» fýtbol klýbynyń bas bapkeri bolyp taǵaıyndalǵanyn habarlaǵan edik.