Tamyzǵa deıin ortalyq atqarýshy organdar saıttarynyń jumystary «Aqparatqa qoljetimdilik týraly» zańǵa sáıkestendiriledi
ASTANA. QazAqparat - Búgin Parlament Májilisinde Jańǵyrtý jónindegi ulttyq komıssııanyń «Ashyq Úkimet» engizý jónindegi Kishi jumys tobynyń otyrysy ótip, «Aqparatqa qol jetkizý týraly» Qazaqstan Respýblıkasynyń Zańynyń sheńberinde «Ashyq úkimetti» engizýdiń máseleleri talqylandy.
Aıta keterligi, Jańǵyrtý jónindegi ulttyq komıssııanyń «Ashyq Úimetti» engizý jónindegi Kishi jumys toby «100 naqty qadam» Ult josparyn is júzinde iske asyrý maqsatynda depýtattar, memlekettik organdar men úkimettik emes uıymdardyń ókilderi arasynan qurylǵan.
Jıyn barysynda Investıtsııalar jáne damý vıtse-mınıstri Sáken Sársenov baıandama jasap, atqarylyp jatqan sharalarǵa toqtalǵan bolatyn. «Bizdiń mınıstrlik «Aqparatqa qol jetimdilik týraly» Zańnyń atqarylýy boıynsha úlgi alańy retinde shyǵýǵa ázir. Osyǵan baılanysty biz ishki is-sharalar josparyn da ázirledik», - dedi S. Sársenov.
Vıtse-mınıstrdiń aıtýynsha, qazirgi ýaqytta zańdy júzege asyrýǵa qajetti 8 zańǵa táýeldi akti, 4 Úkimet qaýlysy, 4 mınıstr buıryǵy qabyldanǵan. Ortalyq memlekettik organdardyń 17 ınternet-resýrsyna baǵalaý jasalyp, olardyń Zańǵa sáıkestigi tekserildi. «Osy baǵytta mınıstrlik memlekettik organdarmen saıttardyń zańǵa sáıkes bolýyna baǵyttalǵan sharalardy atqarýda. Aqparattyń tolyq qamtylýy men ózektiligine qatysty memlekettik organdardyń osy jumysy aǵymdaǵy jyldyń tamyzyna taman aıaqtalady. ıAǵnı, ortalyq atqarýshy memlekettik organdardyń saıty osy ýaqyttan bastap Zańǵa saı tolyq qyzmet etedi», - dedi S. Sársenov.
Otyrysty qorytyndylaı kele, Kishi jumys tobynyń jetekshisi Halyqaralyq ister, qorǵanys jáne qaýipsizdik komıtetiniń tóraǵasy Máýlen Áshimbaev qaralyp otyrǵan másele jan-jaqty ári nysanaly talqylanǵanyn atap ótti. Onyń aıtýynsha, talqylaýda kóterilgen syndarly eskertýler men usynystar Qazaqstanda «Ashyq úkimetti» engizý baǵytyndaǵy aldaǵy jumysta eskeriletin bolady.
