Tamyzdyń 20-ynda uıaly baılanys operatorlary jeliaralyq baılanystyń mólsherlemelerin tómendetý boıynsha usynys jasaıdy
ASTANA. Tamyzdyń 4-y. QazAqparat /Rýslan Ǵabbasov/ - Búgin Astanada ótken baspasóz máslıhatynda QR Básekelestikti qorǵaý agenttigi tóraǵasynyń orynbasary Rýstam Aqberdın tamyzdyń 20-ynda uıaly baılanys operatorlary jeliaralyq baılanystyń mólsherlemelerin tómendetý boıynsha usynys jasaıtynyn aıtty.
«Tamyzdyń 20-ynda olar jeliaralyq baılanys mólsherlemelerin óz erikterimen tómendetý boıynsha usynystaryn engizýleri tıis. Sol kezde biz olardyń qanshalyqty daıyn ekendikterin baıqaımyz (Kar-Tel» jáne «Qazaqtelekom» aktsıonerlik qoǵamynyń «GSM Qazaqstan» JShS)», - dedi ol. Osy oraıda R. Aqberdın agenttik baılanys operatorlarynyń bul tarıfti barynsha túsirýin kútip otyrǵanyn jetkizdi.
Básekelestikti qorǵaý agenttiginiń málimetine qaraǵanda, jeliaralyq baılanystyń quny mınótine 19,98 teńgeni qurap otyr.
«Qazaqstanda abonentterge arnalǵan uıaly baılanys qyzmetine tarıfter tym joǵary», - dep atap ótti R. Aqberdın. Osy oraıda ol tarıfterdiń qymbat bolýynyń bir sebebi retinde uıaly baılanys salasyndaǵy bólek operatorlardyń jeliaralyq baılanys úshin mólsherlemeleri joǵary bolyp otyrǵanyn atap ótti.
R. Aqberdınniń aıtýynsha, eger baılanys operatorlary tıisti sheshimge kelmese, onda monopolııaǵa qarsy vedomstvo bul mólsherlemelerge memlekettik retteý engizýge nıetti.
