Tamyzdyń 1-inen bastap «KEGOC» AQ jelileri boıynsha elektr energııasyn jetkizýdiń biryńǵaı tarıfi qoldanysqa enedi
ASTANA. Maýsymnyń 30-y. QazAqparat - Elimizdiń Tabıǵı monopolııalardy retteý agenttiginiń sheshimine sáıkes 2010 jylǵy tamyzdyń 1-inen bastap ulttyq elektr toraby arqyly elektr energııasyn jetkizý qyzmetine barlyq sanattaǵy tutynýshylar úshin 0,94 teńge/kVts mólsherindegi biryńǵaı tarıf qoldanysqa enedi.
Bul aqparatty atalǵan kompanııanyń baspasóz qyzmeti taratyp otyr.
Kompanııa aqparatyna sáıkes, elektr energııasyn jetkizýdiń biryńǵaı tarıfi buryn qoldanysta bolǵan, ıaǵnı jetkizilgen elektr energııasynyń kılovatt-saǵatyna tólenetin 0,762 teńgeden 1,216 teńgege deıingi 8 aımaqtyq tarıftiń ornyna engizilip otyr. Biryńǵaı tarıfti engizý tarıfti qalyptastyrý men baǵa belgileý tetiginiń aıqyndyǵyn arttyrýǵa, 2010-2014 jyldarǵa arnalǵan Údemeli ındýstrııalyq-ınnovatsııalyq damý baǵdarlamasyna sáıkes óńirlik damý deńgeıiniń ósýine yqpal etedi.
«Biryńǵaı tarıfke kóshý QR-nyń Halyqaralyq qaıta qurý jáne damý banki (HQDB) aldyndaǵy elektr energııasyn jetkizý tarıfiniń qashyqtyqqa táýeldiligin joıý jónindegi mindettemesin oryndaýda qorytyndy kezeń bolmaq jáne ulttyq elektr torabynyń qol jetimdiligin, sonyń ishinde Kedendik odaq sheńberinde elektr energııasyn eksporttaý-ımporttaý men tranzıttik operatsııalardy júzege asyratyn sýbektilerdiń teń quqyn qamtamasyz etpek», delingen baspasóz habarlamasynda.
Elektr energııasyn jetkizý qyzmetine biryńǵaı tarıftiń engizilýi men aqyrǵy tutynýshylar úshin elektr energııasynyń baǵasyndaǵy «KEGOC» AQ úlesin eskere otyryp, Almaty, Qostanaı oblystary men Almaty qalasynda elektr energııasynyń baǵasy 1-2,5%-ǵa tómendeıdi dep kútilýde.
