Tamyzda jumyspen qamtylǵandar sany 0,2 paıyzǵa artty - Statıstıka

ASTANA. 12 qyrkúıek. QazAqparat - 2013 jylǵy tamyzda respýblıka ekonomıkasynda 8,6 mln. adam (baǵalaý boıynsha) jumyspen qamtyldy. Bul týraly QR Statıstıka agenttiginiń baspasóz qyzmetinen habarlady.

Vedomstvonyń aqparatyna qaraǵanda, ótken jylǵy sáıkes kezeńge qaraǵanda olardyń sany 16,6 myń adamǵa nemese 0,2%-ǵa kóbeıdi. Jaldamaly qyzmetkerlerdiń sany atalǵan kezeńde 5,9 mln. adamdy (jumyspen qamtylǵandardyń jalpy sanynan 69,1%) qurady.

2013 jylǵy tamyzda jumyssyzdar sany, baǵalaý boıynsha 469,4 myń adamdy, jumyssyzdyq deńgeıi 5,2% qurady. Qazaqstan Respýblıkasy Eńbek jáne halyqty áleýmettik qorǵaý mınıstrliginiń jumyspen qamtý organdarynda 2013 jylǵy tamyz aıynyń sońyna 58,8 myń adam («Jumyspen qamtý 2020 jol kartasyna» qatysatyndar quramyna engizilgen tulǵalardyń esebinsiz) resmı tirkelgen. Tirkelgen jumyssyzdar úlesi ekonomıkalyq turǵydan belsendi halyqtyń 0,6%-yn qurady (2012 jylǵy tamyzda - 0,7%).