Tamyzda elimizde rekordtyq mólsherde jaýyn jaýdy
ASTANA. QazAqparat – Qazaqstanda tamyz aıy jańbyrly boldy, jaýyn-shashyn mólsheri boıynsha elimizde rekord tirkeldi, dep habarlaıdy QazAqparat Qazgıdrometke silteme jasaı otyryp.
Sınoptıkterdiń dereginshe, tamyzdyń alǵashqy onkúndigi men úshinshi onkúndiginiń basynda antıtsıklonnyń áserinen Qazaqstannyń basym bóliginde +34+43°S-qa deıin ystyq boldy. Osy kúnderi respýblıkanyń keı óńirlerinde eń joǵary aýa temperatýrasy boıynsha rekord tirkelgen.
Máselen, 2 tamyzda astanada aýa temperatýrasy +34,3°S deıin kóterilip, 2021 jylǵy rekord (+33,2°S) jańardy, 5 tamyzda Aqtaýda aýa temperatýrasy +41,5°S-qa jetip, 2015 jylǵy rekordtan (+40,2°S) asty, al Almatyda +38,5°S bolyp, osy kúngi rekord tirkeldi. Buǵan deıin absolıýt joǵarǵy temperatýra 2015 jyly +37,1°S bolǵan edi.
Tamyzda jaýyn-shashyn mólsheri jóninen de rekord ornady. Máselen, 10 tamyz Qaraǵandyda bir táýlik ishinde 54 mm jańbyr jaýdy. Bir aıdaǵy norma – 29 mm. 11, 12, 13 tamyzda Almaty oblysynyń taýly, taý bókterindegi aýdandarynyń keı jerlerinde 15-43 mm-ge deıin nóser jańbyr jaýyp ótti (12 tamyzda Almatyda 26 mm jańbyr jaýdy, norma – 34 mm. 14 tamyzda Myńjylqy meteostantsııasynda 7 mm-ge deıin qar jaýdy). Al 27, 31 tamyzda Túrkistan oblysynda 15-24 mm nóser jańbyr jaýdy (27 tamyzda Shymkentte 28 mm jaýdy, bir aıdaǵy norma – 4 mm). Bir aı ishinde jel kúsheıip otyrdy, onyń ekpini 15-32 m/s deıin jetti, al 31 tamyzda Dostyq meteostantsııasynda (Jetisý oblysy) jeldiń ekpini 45 m/s deıin jetti.
Astanada eń tómen aýa temperatýrasy 14 tamyzda tirkelip, +8,7°S boldy. Al eń joǵary - +35,4°S 23 tamyz kúni tirkeldi. Bir aı ishinde 27 mm jaýyn-shashyn tústi, aılyq norma – 31 mm (normanyń 87%-i).
