Tamyz máslıhatynda Astananyń pedagogtary birqatar marapattar men páter kiltterin aldy

Búgin Kongress-Holl saraıynda bilim salasy qyzmetkerleriniń dástúrli tamyz máslıhaty ótti. Onyń barysynda QR Bilim jáne ǵylym vıtse-mınıstri Serik Yrsalıev úsh ustazdy «Qazaqstan Respýblıkasy bilim berý isiniń qurmetti qyzmetkeri» tósbelgisimen jáne taǵy úsh pedagogty QR Bilim jáne ǵylym mınıstrliginiń Y.Altynsarın atyndaǵy tósbelgisimen marapattady.

Óz kezeginde Astana ákimi Imanǵalı Tasmaǵambetov mektepter men mektepaldy bilim mekemeleriniń barlyǵy 10 qyzmetkerine páter kiltterin tabys etti.

Qala ákiminiń aıtýynsha, 2008 jyldan beri memlekettik turǵyn úı baǵdarlamasy boıynsha jáne mýnıtsıpaldyq arendalyq turǵyn úı qorynan 2 myńǵa jýyq muǵalim baspana aldy.

Onymen birge, shara barysynda «Eń úzdik saıt» qalalyq baıqaýynyń qorytyndysy jarııalandy. Ákim birinshi oryndy jeńip alǵan №54 mektep-lıtseıiniń, ekinshi oryndy ıelengen №31 mektep-gımnazııanyń jáne úshinshi orynǵa ıe bolǵan №2 mektep-gımnazııanyń ókilderine syılyqtar tapsyrdy.