Tamyz konferentsııasynda bilim salasyna qatysty barlyq máseleler talqylanady - BǴM
ASTANA. QazAqparat - Bıylǵy Tamyz konferentsııasy 22 tamyzda Astanadaǵy EKSPO-2017 Halyqaralyq kórmesi aımaǵynda ótedi. Oǵan deıin aımaqtarda sektsııalyq otyrystar uıymdastyrylady. Mınıstrlik bilim salasyn jan-jaqty talqylaýdy kózdeıdi. Osyǵan oraı, barlyq ózekti máselelerdi Bilim jáne ǵylym mınıstrliginiń resmı paraqshalaryna joldaýǵa bolady, dep xabarlaıdy QazAqparat tilshisi.
QR Bilim jáne ǵylym mınıstrligi mektepke deıingi jáne orta bilim berý departamentiniń dırektory Sholpan Karınovanyń aıtýynsha, bıylǵy konferentsııa jańa formatta uıymdastyrylady. Sektsııalyq otyrystar árbir oblys ortalyǵynda ótetin bolady.
«Mektepke deıingi bilim mekemeleriniń máseleleri Oral qalasynda qaralady. Al eń úlken sektsııalar bilim salasyn jańa mazmunǵa toltyrýǵa arnalady. Atalǵan sektsııalar ár oblys ortalyǵynda ornalasqan Nazarbaev zııatkerlik mektepteriniń bazasynda uıymdastyrylady. Atalǵan taqyryptyń mańyzdylyǵy zor. Sebebi bıyldan bastap 2-shi, 5-shi jáne 7-shi synyptar jańa baǵdarlama boıynsha bilim alatyn bolady», - deıdi Karınova.
Departament basshysynyń aıtýynsha, arnaıy qajettiligi bar balalarǵa bilim berý máseleleri Qaraǵandy qalasyndaǵy sektsııada talqylanady. Almaty qalasynda daryndy balalardy oqytý jaıy sóz bolady. Al Pavlodarda pedagogıkalyq mamandar máselesi qaralady.
«Sosyn bıyldan bastap ata-analar men oqýshylardyń qalaýy boıynsha jaratylystaný-matematıka pánderi aǵylshyn tilinde oqytylady. Osyǵan baılanysty Astanadaǵy Nazarbaev ýnıversıtetinde arnaıy sektsııa uıymdastyrylady. Qaladaǵy taǵy birneshe sektsııa rýxanı damý, kámelettik jasqa tolmaǵandardy ómirge beıimdeý, joǵary bilim berý salasynda mamandardy daıarlaýǵa arnalady. Al Eýrazııa ulttyq ýnıversıtetindegi taǵy bir sektsııada bilim berý xabin damytý máselesi qaralady. Oǵan oblystyq departament basshylary, sarapshylar men ǵalymdar qatysady», - dedi Karınova Astanada ótken baspasóz máslıxatynda.
Aıta keteıik, brıfıng kezinde QR Bilim jáne ǵylym mınıstrliginiń jaýapty xatshysy Aryn Órsárıev EKSPO-ǵa baılanysty astanalyq oqýshylardyń demalysyn uzartýǵa qatysty suraqqa jaýap berdi .
